సత్యనారాయణ వ్రతం పద్యాలలో

 

        సత్యదేవుని పూజ

-----------------------------------------+--

శ్రీ గణాధిప నిలిచి నా చిత్తమందు

సత్య దేవుని కీర్తనల్ సలుప గలుగు

శక్తినొసగుము కూర్మితో శక్తి పుత్ర 

శరణుశరణము నీ దివ్య చరణ యుగళి

వాణీ వనరుహ భవు హృది 

రాణీ  యళినీలవేణి రాజిత వీణా

పాణీ విద్యాధరిక

ళ్యాణీ కరుణించు నను దయామృత వృష్టిన్

మాటవై పాటవై నా మదిన్ నిల్వుమా

బాటవై గమ్యమై పాలనన్ సేయుమా

కోటవై మూటవై కోర్కెలన్ దీర్చుమా

సాటినీకేదిలన్ సాకుమా రాఘవా

క్షీర సాగర మందున శేష పాన్పు

పాన్పునన్ పవళించెడి పరమ పురుష

పురుష శ్రేష్ఠ నీ పదసేవ పుణ్య వరము

వరద లక్ష్మీ సమేతభివందనములు

హేమపీఠము నొనగూర్తు కోమలాంగ

రత్నఖచితాసనంబుల రయముగూర్తు

అర్ఘ్య పాద్యాచమనములనందుకొనుము

సత్యనారాయణా స్వామి శరణుశరణు

పాలు పెరుగు ఘృతము తేనె పంచదార

కలిపి భక్తితోనభిషేకములను జేసి 

పంచసూక్తములాదిగా పఠన జేసి

శుద్ధ గంగాజలాలతో శుద్ధిజేతు

పట్టు పీతాంబరము కట్టి పరవశించి

దివ్య యజ్ఞోపవీతాల తీర్చి దిద్ది

మంచి గంధము తిలకమునుంచి మ్రొక్కి

పసుపు కుంకుమల్ నర్పించి ప్రణుతి జేతు

మంచి పరిమళాల మల్లె పూవుల మాల

        మాధవానర్పింతు మనసుదీర

కనకాంబరాలతో కళ్యాణమాలను

         వేడ్కదీరగ వేతు వేదవేద్య

రంగురంగులమేను రాజిల్లి శోభించ

         జాజిపూమాలతో పూజసేతు

చామంతి పూబంతి చంపక మాలలు

          గోవింద నీ చెంత కులుకజేతు

తులసిదళముల నర్చింతు తోయజాక్ష

బిల్వ దళముల పూజింతు విమల చరిత

పారిజాతాల సేవింతు పద్మనాభ

నిత్య పూజన సుమములు సత్యదేవ

చందనాగరు ధూపాలు సచ్చరిత్ర

గోఘృతాన్విత దీపాలు కూర్మరూప

పంచ భక్ష్యాలు భోజ్యాలు పాపనాశ

గొనుము దయగను మా పైన కువలయాక్ష 

మంగళము రమా నాయక

మంగళము సురేంద్ర వంద్య మంగళకర శా

రంగ ధరా శుభ కప్పుర

మంగళ హారతి గొనుమిదె మాధవ కూర్మిన్

నిఖిల లోకాలకాధార నియతమైన

ప్రాణి జడముల రూపుగా బరగుచున్న

ఆది మధ్యాంత రహితమై అలరు పాద

యుగళమా మంత్ర పుష్పము యొప్పగొనుము

    మొదటికథ

        ------------------------

పుణ్య నైమిశారణ్యాన ధన్య మునులు

శౌనకాదులు కోరిరి శౌరి కథలు

ఇహము సౌఖ్యము పరము రమేశ పదము

నొసగు వ్రతమును ప్రేమతో నుడువు మనిరి

రోగ పీడల ద్రోసి యారోగ్యమొసగి

వాంఛితంబుల నెరవేర్చి భాగ్యమొసగి

కలియుగంబున శ్రేష్ఠమై యలరు వ్రతము

పూని చెప్పగా కోరిరి మౌనివరులు

వ్యాసశిష్యుడు శుభ దరహాసయుతుడు

సూత పౌరాణికుండు సుశ్రోతల గని

మున్ను నారదుడీరీతి విన్నవించె

విష్ణు మూర్తితో నాకథ వినుడి మీరు

నారదముని లోకములను

నారయ కృపచే వెడలె సునాయస రీతిన్

వారిజనాభుని స్మరణన

జేరెను మన మనుజ లోక చింతలు దీర్పన్

నానా యోనుల బుట్టుచు

నానా జన్మల కృతముల నాబీలముతో

నానా యిడుముల కుందుచు

నానాటికి కృంగు మనుజ నాశము గనియెన్

ఒరుల కష్టము నష్టము నరసినంత

చేయ గలిగిన సాయమున్ చేయవచ్చు

బాధదీరు నుపాయమున్ బోధ చేయ

గలుగు వైకుంఠ వాసునిన్ గనగ జనియె 

శంఖ చక్ర గదయు చక్కని వనమాల

నాల్గు చేతులందు వెల్గువాడు

శేషశాయి భక్తపోషణా వరదుండు

భానుకోటిప్రభలనీనుచుండె

అట్టి నారాయణున్ జూచి 

భాషకందవు మనసున పట్టుబడవు

ఆదిమధ్యాంత రహితుడవయ్యనీవు

భక్త జనముల యార్తిని బాపుకరుణ

వందనము భక్తమందార వాసుదేవ

వందనములు మధుసూధన 

వందనములు వనజనేత్ర వనరుహనాభా

వందనమభివందనములు

వందిత వదనారవింద వైకుంఠ పతే

అనుచు నుతులజేయు అమరమౌనీశుని

కనులజూచి మిగుల కనికరించి

రాక కారణమును రయముగ తెలుపంగ

ఆనతిచ్చెహరియు నమిత కరుణ

మర్త్య లోకము నందున్న మానవాళి

పలు విధంబుల కష్టాలనలిగినారు

జన్మజన్మాల పాపాల ఛాయ మాసి

ముక్తినొందెడి మార్గమున్ ముదము జూపు

అనిన నారదునితో నారాయణుండు

లోక హితమును కోరుచు ప్రాకటముగ

యోగ్యమగు ప్రశ్న నడిగిన యోగివర్య

ఏడు లోకాలు కాలాలు మూడు గనని

వ్రతమునొక్కటి చెప్పెద యతికులేంద్ర

తనవలన పరులవలనిట

యొనగూరిన దుఃఖ గరిమ నొప్పుగ మాన్పున్

ధనధాన్యపుత్ర సంపద

ననయము సర్వత్ర జయము నలరగజేయున్

సంతసంబొనగూర్చు చింతలెన్నోదీర్చు

              సిరిసంపదలనెల్ల కురియు వ్రతము

ఆయురారోగ్యాల నమిత సౌభాగ్యాలు

              ఐహికానందాల నలరు వ్రతము

కష్టాలతొలగించి నష్టాలు వదిలించి

      మనుటమార్గము జూపు మంచివ్రతము

శాంతిని కలిగించి సంతాన ఫలమిచ్చి

           సర్వత్ర జయమిచ్చి సాకు  వ్రతము

భక్తి భావాన పూజించ పలుకువ్రతము

కమలనాథుని దరిజేర్చి కాచువ్రతము

జన్మ జన్మాల పాపమున్ జార్చు వ్రతము

సత్యనారాయణ వ్రతమె సత్య పథము

మాఘమో వైశాఖ మాసమో కార్తీక

           మాసమో యేదేని మంచిదగును

ప్రీతితో రణమన్న భీతితో దారిద్ర్య

           బాధతోనొనరించ భాగ్యమిడును

స్పూర్తితో మదిలోని ఆర్తితో బలమైన

           వ్యాధితో చేయగా వరమునిడును

ప్రేమతో సంతాన లేమితో సంసార 

            గ్లానితో సలుపంగ లాభమగును

పౌర్ణిమందునేకాదశీ పర్వమందు

సూర్యసంక్రమణంబను శుభదినమున

మాసమాసము ప్రతియేడు మాధవుడిని

విధిగనర్చనల్ సేయంగ ముదమునిడును         

అనుచు నారాయణుండన మునివరుండు

తెలియగోరుచు వినయాన పలికె నిటుల

ఇట్టి వ్రతమును నొనరించు విధమదేది?

ఏది ఫలమది?చేసినారెవరదెపుడు?

ఒక్క మాసమునందలి నొక్కదినము

ఉదయమే  లేచి శుద్ధియై యుపవసించి

అస్తమయమును దాటిన యమిత భక్తి

స్వామి వ్రతమును సేయంగ లేమిలేదు

బంధుజనములు మిత్రులు భక్తవరులు

విప్రవర్యులు విజ్ఞులు వేడుకవగ

గుండె గుండెననానందముండు వేళ

సత్యదేవుని రూపమే సకల ధరణి

అరటి యాకులుదెచ్చి చెరుకు గడలకల్పి

               నాలుగు స్తంభాలు నాటికట్టి

మంటపానికి మధ్య మంచి వస్త్రము వేసి

                తండులాలు కలశ భాండముంచి

గణపతి స్థాపించి ఘనముగ పూజించి

              విఘ్నముల్ నశియించ వినుతిజేసి

గౌరి మాతను నవ గ్రహముల నర్చించి

               వాసుదేవుని మూర్తి భక్తినుంచి

శోడషోపచారాలతో శోభగూర్చి

పంచభక్ష్యాలు నైవేద్య మంచుజూపి

ఆవునేయి గోధుమచూర్ణమరటి పళ్ళు

శర్కరను మేళవించ ప్రసాదమిడుము

లేనివేళలో వరిపిండి పూని బెల్ల

మున్నివేదనమొనరించి సన్నుతించి

బంధుమిత్రులతో కూడి పరమభక్తి

పూజలను సేయనెనలేని పుణ్యమబ్బు

అయిదు కథలను శ్రద్ధతో నాలకించి

అన్నదానము దక్షిణలమిత ప్రీతి

అర్పణముజేసి భజనలత్యంత భక్తి

సలుపగా సత్య దేవుడే సకలమొసగు

అనియు శ్రీహరినారదమునికి దెలుపు

శుభ చరిత్రము వినిపించె సూతుడపుడు

విన్నవారికి సతతము విజయమిడును

సత్యదేవుని కరుణన సఫలమగును

స్కాందపురాణాంతర్గత

వందిత రేవా విభాగ వైభవమందా

నందముగమొదటి కథ గో

విందుని దివ్యచరణారవిందార్పణమౌ

        మొదటి కథ సమాప్తం

ద్వితీయోధ్యాయం

వేదవిదుడగు విప్రుడు విమలమతుడు

కాశి పట్టణ మందున కలడునొకడు

కటిక దారిద్ర్య సంక్షోభ కారణాన

తిరుగు భిక్షకై ఇల్లిల్లు తెరువు లేక

భూసురులన వాత్సల్యము

భాసురముగ విష్ణుమూర్తి భావన పొడమన్

భాసిల్లు వృద్ధ బ్రాహ్మణ

వేసముతోకరుణ నిలిచె విప్రుని యెదుటన్

అమిత దుఃఖము నీకేల అవని నంత

సంచరించెదవెందుకు సాధుపురుష

అనుచు వృద్ధుడు ప్రశ్నించనమిత కరుణ

ధనవిహీనుడ భిక్షార్థిననుచు తెలిపి

తరుణోపాయము తెలుపుము

కరుణను నను కనికరించు కారణ జన్మా

నరుడవొ మొరవిని దయగను

మురహరివో నెరుగజాల మోహముతోడన్

అనుచు వేడిన విప్రునిన్ కనికరించి

వృద్ధుడీరీతినుడివె సమృద్దికొరకు

పుడమి సత్యనారాయణ పూజయొకటి

వాంచితార్థము దీర్చగా వరలుచుండె

అట్టి వ్రతమును సేయుము నమిత భక్తి

అష్ట దారిద్ర్యముల్ దీరు ననుచు పలుకి

వ్రత విధానము నెరిగించి భయముదీర్చ

వందనమన అంతర్ధానమొందినాడు

వృద్ధ విప్రుని బోధనే విశదమగుచు

నంతరంగమునంతటన్ హరియు నిండ

రేయినంతయు మేల్కొని హాయిగూర్చు

భజన కీర్తన మొనరించె భక్తి యుతుడు

వేకువనలేచి వేల్పును వేడ్క తలచి

భిక్షసేయగ దొరికిన విత్తమంత

వాసుదేవుని పూజకై వస్తు తతుల

పూర్తి గొనుచును  వ్రతము సంపూర్తిజేసె

మాసమునకొక్క పర్యాయ మాచరించి

సకల సంపదలొనగూరి సంతసించి

భువిన పూజించి సుఖియించి పుణ్యగరిమ

విష్ణు సాయుజ్యమునుపొందె విప్రవరుడు

సత్యదేవుని వ్రతమును సలిపినంత

సకల దుఃఖముల్ నశియించి సంతసించు

కల్ప వృక్షంబు నిదియొక కామధేను

వగుచు భక్తుల కాచులే యనవరతము

అని నారద మునితో హరి

యనెనని సూతుండు పలుకనాముని వర్యుల్

గని విప్రునిచే వ్రతమును

వినిచేసిన వారిగూర్చి వివరమునడుగన్

కట్టెలమ్ముచు జీవించు కష్టజీవి

దాహపీడితుడగుచును దేహమలసి

బ్రాహ్మణుని యింట జరిపెడి వ్రతము జూసి

అడిగె వందనమర్పించి యవనిసురుని

ఏమి వ్రతమిది సలిపిన నేమి ఫలము

వివరము దెలుపగా కోర విప్రుడనియె

సత్యదేవుని వ్రతమిది సలుప నాకు

కలిగె ధనధాన్యసంపదల్ కరుణ ననియె

నమ్ముకొని మ్రొక్కి కట్టెల నమ్మువాడు

సత్యదేవుని దివ్య ప్రసాద మొంది

నేడు పొందిన ధనముచే నియమమొప్ప 

వ్రతము సేయుదు ననుకొని వడిగ జనియె

స్వామి కరుణ వలన సమాకూర రెట్టింపు 

వలయు నంత వస్తు వులనుకూర్చి

బంధుజనముగూడి భక్తి తో పూజించ

సకల సంపదలతొ సుఖమునొందె

అటు బ్రాహ్మణ సత్తముడును

ఇటు కట్టెలనమ్మువాడు నిరువురునిలలో

దిటవుగ వ్రతమొనరించుచు

నిట సుఖపడి సత్యలోకమేగిరి ఫలమున్

స్కాందపురాణాంతర్గత

వందిత రేవా విభాగ వైభవమందా

నందిత రెండవ  కథ గో

విందుని దివ్యచరణారవిందార్పణమౌ

           

   రెండవకథ సమాప్తం

          మూడవకథ

పూర్వముల్కాముఖుండను భూపుడొకడు

 సత్యవాది జితేంద్రయుసద్గుణుండు

 దైవదర్శనమును కోరి దేవళమున

 కేగునిత్యము విప్రుల బాగు కోరు 

ధర్మచారిణి సుచరిత ధన్యజీవి 

సాధువర్తని సౌందర్య శాంతమూర్తి 

వర పతివ్రతయగు నిజపత్ని కలిగి 

ధర్మకార్యాచరణమున తనరె విభుడు 

ప్రజలు బంధువుల్ స్నేహితుల్ ప్రణుతులిడగ

 రాజ దంపతులిరువురు రమ్య భక్తి 

భద్ర శీలా నదీ తీర ప్రాంతమందు 

సత్యదేవుని వ్రతమును సలిపినారు 

కోరి సాధువుయనియెటి కోమటీడు

వ్రతముగని మ్రొక్కి రేనితో  ప్రశ్న జేసె 

ఏమి వ్రతమిది చేసిన నేమిఫలము 

అనుచు ప్రశ్నింప నవనీశుడనియెనిట్లు

విపుల రాజ్యము సంపదల్ విమల యశము

కలిగి సుఖమయ జీవనంబలరె గాని

పుత్ర లేమిచే వేదన పొంగిపోగ

వరము గోరుచు సలిపిన వ్రతమిదనెను

వర్తకుండు వినయ వర్తియై రాజుతో

పలికెనిట్లు పుత్ర భాగ్యమకట

నాకు గూడ లేదు నారాయణున్నమ్మి

పూజజేతునయ్య పూర్ణభక్తి

అనుచునాలి జేరి అద్భుత వ్రతమును

తెలిపి నంత లలన ధిషణ చేత

సంతు గలిగినంత సలిపెద వ్రతమని

మ్రొక్కుకొనియె భక్తిమోదమలర

లీలా ధర్మ పరాయణ

శీలా లీలావతి పతి సేవనమందున్

శ్రీలక్ష్మీ పతి కరుణన

చూలాలై మురిసె ప్రకృతి శోభను గనుచున్

పదియవ మాసమునన్ శ్రీ

ప్రదమగు దివసంబునందు భాగ్యంబనగన్

సుదతీ లీలా వతి సం

పద సమ పుత్రికను పొంది పరవశమొందెన్

శుక్ల పక్ష చంద్ర సోయగంబను రీతి

కళలు శోడషంబు గలిగి వృద్ధి

చెందుచున్నవేళ చిన్నారినిన్ బిల్వ

గా కళావతి యనినారు గారవమున

నామకరణ దినోత్సవ నేమమందు

పతిని జేరి లీలావతి ప్రాణనాథ

సంతు గలిగిన వ్రతమును సలుపెదమని

శరణమని కోరితిమి గాదె జాలమేల 

అనుచు ప్రశ్నించ వైశ్యుడు ననియెనిట్లు

దేవి మన పుత్రి కళ్యాణ దివసమందు

వైభవోపేతముగ సేయ వచ్చు ననుచు

చెప్పి యొప్పించె నిల్లాలి చింతదీర్చ

దుహిత యుక్త వయస్సును దొరలినంత

మంచి వరునికై దూతను పంచె సెట్టి

కాంచనంబను పురమును గాంచి మంచి

రూపసిని గుణవంతుని యోపిదెచ్చె

పరమ సంతుష్టుడై తమ భాగ్యమనుచు

మంచి లగ్నముహూర్తమునెంచి బహుళ

బంధుమిత్రుల సన్నిధిన్ వరుని గాంచి

కన్నియను దానమొసగె శ్రీ సన్నిభుండు

ధనము మిగుల గలిగి తనరు సౌఖ్యము గల్గి

బేరమందు లాభసారమెరిగి

సతత జయము గలిగి సత్యనారాయణ

వ్రతము మరచినాడు వర్తకుండు

అలిగి సత్యదేవుండిట్లు తలచి మిగుల

సుఖము గలిగిన నరునకు సుంతయైన

పరమపురుషుని భావన పట్టుబడదు

దైవమును మది నిలుపును దైన్యమొకటె

సతత దుఃఖము పొందగా శాపమిడెను

పని చేయనెరుగక తినుచు కూర్చుండిన

    గిరులైన క్షణములో కరిగిపోవు

ననుచు నల్లునితోడ నాదాయమును పొంద

   వ్యాపారమును సేయు భావనమున

వజ్రవైఢూర్యాలు బంగారమును గొని

    రత్నసాను పురము రయము జేర

అల చంద్ర కేతు మహారాజు ధనమును

   చోరుడొక్కడు దోచి భీరుడగుచు

వర్తకుల చెంత వదలుచు పరుగుదీయ

వెంబడించిన భటులంత వెదికి వెదికి

మామ యళ్ళుళ్ళ కడ గాంచి మనుజవరుని

చెంత నిలిపిరి మ్రుచ్చులన్ చింతనమున

మ్రుచ్చులము కాము ధనమును

మ్రుచ్ఛిల లేదని మరిమరి మొరలిడినన్ ని

క్కచ్చిగ రాజాజ్ఞను గొని

యచ్చెరసాలను నునిచిరి యా వర్తకులన్

ఇచ్చటిలా ఉండగా

చోరుడొక్కరుండు దారుణమౌ రీతి

సదనమందు సిరుల సంగ్రహించ

భిక్షగోరి తల్లి బిడ్డలు ప్రతి యిల్లు

దినము గడుచుకొరకు తిరిగినారు

సుత కళావతి యొకనాడు మెతుకుకోరి

విప్రవాడను చరియించు వేళలోన

సత్య దేవుని పూజించు సదనమందు

చేరి మ్రొక్కి ప్రసాదము కోరిగొనుచు

నమిత ముదమున ఇలుజేరె నర్థరాత్రి

బాలా నీ పతి లేనీ

వేళన ఈరాత్రి వరకు వీధి చరించన్

మేలా యని ప్రశ్నించిన

లీలావతికిన్ ముదమిడు లీల వచించెన్

తప్పుసేయలేదు తలపునైననులేదు

తిరుపమెత్త నేను తిరుగువేళ

పాఱునింట సత్య నారాయణ వ్రతం

బాచరించ గంటియమ్మనేడు

అని కళావతి పలుకగా మనములోన

సత్యదేవుని మ్రొక్కు సాక్షాత్కరించ

శక్తి గలిగిన రీతిలో సత్య వ్రతము

సలిపి యల్లుడిని పతిని తలచుకొనుచు

వేగ యింటికి చేర్చగా వేడుకొనియె

కరుణా పయోనిధి కమలాధి నేత యా

   చంద్రకేతు నృపాలు స్వప్నమందు

కనిపించి శాసనమనిపించు రీతిగా

   చక్కగా పలికె నో చంద్రకేత

కారాగృహంబున నేరస్తులై శిక్ష

   ననుభవించెడి భక్తి ధనులుఘనులు

వైశ్య రత్నంబులు వర్తక శ్రేష్ఠులు

    వ్రత భ్రష్టులై బహు వెతల బడిరి

వారినిన్ వెంటనే విడువ వాదులేదు

కాదు లేదని యందువో నీదు సుతులు

రాజ్య సంపద  సిరులు నిర్ఘాతమగును

గాన నా ఆన పాటించ గలుగు శుభము

స్వప్న మందలి విషయమున్ సభనుదెలిపి

చర్చ గావింప వెంటనే సత్యమూర్తి

యాన రోజు శిరసావహించుటే న్యాయమనుచు

బుధులు పలుకగా భటులతోభూపుడనియె

కారాగారము గల వ్యా

పారుల సంకెళ్ళు దీసి  బహు గౌరవమున్

చేరగ గొని రమ్మని యన

వారలు నొనరించినంత వైశ్యులు భయమున్

కరములను మోడ్చి మహారాజు దరికి జేర

నభయమొసగుచు విడుదలకాజ్ఞ నొసగి

దైవవశమున జరిగిన తప్పిదమిది

మోదమే గాని భయమిక లేదు మీకు

అనుచు వైశ్యవరుల కానందమొసగంగ

క్షౌరకర్మములను గలుగజేసి

కొత్తవస్త్రములను కూర్చి రెట్టింపుగా

ద్రవ్యమొసగినాడు ధరణివిభుడు

మీరు చూపిన కరుణతో మేలుపొంది

ఇంటికిని జేర నేడేగుచుంటిమయ్య

అనుచు కరములజోడించి అంజలించి

పలికినారిటు వర్తకుల్  పరమ భక్తి

స్కాందపురాణాంతర్గత

వందిత రేవా విభాగ వైభవమందా

నందిత మూడవ  కథ గో

విందుని దివ్యచరణారవిందార్పణమౌ

             మూడవ కథ సమాప్తం

           నాల్గవ కథ

సాధువు పిదప యాత్రలన్ సలిపి విప్ర

కోటికిన్ దక్షిణల్ నిడి కూర్మితోడ

తన పురంబును జేరగా తరలినంత

తెరువులోపల జరిగెనో పరమ వింత

సాగిన వైశ్యుల గని మది

వేగపరీక్షించ దలచి విష్ణువు తా బై

రాగిగ ఎదురేగి పడవ

లోగిలిలోగలుగు సరుకు రూఢిగనడిగెన్

ధనము మత్తున పరిహాస మనము తోడ

పలికినారిటు వర్తకుల్ ఫలము గనక

ఓయి సన్యాసి ధనమని మాయజేసి

దొంగలించగ తలతువో తులువగుణము

కాలవశము చేత కారడవినుండి యీ

లతలు పత్రములను వెతల గొనుచు

పోవుచుంటిమయ్య లేవులే సిరులేవి

వమ్ముకానిమాట నమ్ముమయ్య

అనుచు వర్తకులాడిన అనృతమునట

గాంచి శాపమొసంగెను కమల పతియు

నోటనేదియు పలికిరో లోటులేక

తీవెలాకులై నిల్చునీ నావలోన

అని శ్రీమన్నారాయణుండు శపించి సముద్ర తీరమునకు వెళ్ళెను

తరిగి పోని సిరులు గిరులుగా నెలవైన

లేదటంచుపలుకురీతి  తగునె

కోరుకున్నపదము నేరుగా దరిజేరు

పలుకులందు శుభము పలుక వలయు

తేలిన పడవలలో  ప

త్రాలను తీవెలను చూచి ధాత్రినిబడుచున్

బేలగనేడ్చిన మామకు

బాలకుడౌ అల్లుడిట్టి భావననొసగెన్

జరిగిపోయిన విషయమునెరిగి చక్క

దిద్దుకొనవలె వగచెడి తీరు తగునె

బొంకితిమి చూడు దండితో జంకులేక

దాని ఫలమిది యతడు చైతన్యమూర్తి

సకల జగమును సృష్టించి సాకి పిదప

లయము జేయు సమర్థుడు లక్ష్మినాథు

డతని శరణన్న క్షణము వాంఛితముదీరు

ప్రీతిదర్శింతమనిగోరె కూతు మగడు

అల్లుడనిన మాట ఆనందమును పంచ

దండిజేరిరపుడు నిండుభక్తి

చరణమంటి పిదప సాధువు ననృతంపు

దోషమంత తొలగ ద్రోయుమనెను

వ్యధనుకుందుచున్న వైశ్యుని గనుగొని

ఆ విరాగి పలికె నార్యపుత్ర

జ్ఞానహీనుడవయి సత్యనారాయణ

వ్రతమువిడగ సకల వెతలు గలిగె

అది విని సాధువు యిట్లు నుతించెను

బ్రహ్మ మొదలు సమస్తదేవతలు నుతులు

జేసియు సగుణ రూపు దర్శించలేరు

విమల నిర్గుణ రూపమే విశదమౌనె

తనుమనంబు వాక్కులగన తరమె మాకు

మూఢుడను నేను మాయచే మోహితుడను

నిన్నునేరీతి నెరుగనో నీరజాక్ష

సత్యదేవుని వ్రతమును శక్తికొలది

సలుపెదను పూర్వ సంపదనలరనిమ్ము

అనవిని శ్రీహరి వైశ్యుని

ధనమును కలుగంగ జేసి తరలిన వణిజుల్

ఘన సంతసమున నారా

యణమూర్తిని గొల్చిచనిరి ఆతర్షములన్

వారి రాక దెలుపగోరుచునొక దూత

నంపినారు ముదము పెంపుగాగ

భటుడు చేరి భక్తివ్రతమును జేయు లీ

లావతికిని తెలుప హ్లాదమొందె

ఓ కళావతి వినుమమ్మ ఒక్క క్షణము

నీదు పెనిమిటి మీతండ్రి నిశ్చయముగ

నేగుదెంచిరి వెళ్ళెద జాగు లేక

వ్రతము నొనరించి పిదప సమ్మతిగ రమ్ము

అనిన తల్లి మాటనాలకించిన పుత్రి

వ్రతము వేగ సలిపి పతిని గనగ

భవ్య ఫలము గూర్చు దివ్య ప్రసాదము

వీడి పయన మైన కీడు గలిగె

తన ప్రసాదము విడిచిన తరుణిజూచి

అగ్రహోదగ్రుడై హరి అలిగి నీట

ధనముతో సహా నల్లుని మునగజేసె

దైవశాపము దప్పింప తరముగాదు

భర్త జాడగనని పడతి దుఃఖము పొంది

పుడమి పైన బడుచు పొరలి ఏడ్చె

బాల దుఃఖము జూచి లీలావతియునేడ్చె

సాధువు గని బహు విచారమొందె

ఏ పాపముదీ ఫలమో

నాపాప ముదంబు గొనుచు నడి ఝరిలోనన్

చూపునకు గూడ నోచక

ప్రాపున దుఃఖంబు నిడెనభాగ్యుడనైతిన్

తప్పులెన్నియో జరిగెను తలచకయ్య

వంచకులమని మనమున నెంచకయ్య

కన్న వారిపై కఠినము కానిదయ్య

సత్యనారాయణస్వామి శరణమయ్య

అనుచువేడిన సాధువున్ కనికరించి

ఇట్టు లనియెను శ్రేష్ఠి నీ పట్టి వ్రతము

నొనరజేసి ప్రసాదము గొనదు గాన

కష్టనష్టముల్ కలిగెను కలుగు శుభము

సత్యనారాయణుని మాట నిత్యమనుచు

మరల పూజించి భక్తితో కరము మోడ్చి

ప్రీతి నొంది ప్రసాదము  స్వీకరించి 

పెనిమిటికి తల్లి దండ్రికి గొనుచు చనియె

ఎదుట పరివార యుక్తుడై కదులు విభుని

కన్నులారగ  గాంచెను కౌతుకముగ

సత్య వ్రతమును భక్తితో సలిపి గృహము

చేరబోయిరి కలకాల సేమమడిగి

నాటి నుండియు భక్తితో మేటివ్రతము

సతత పౌర్ణమి సంక్రాంతి సంబరమున

మరువకను జేసి ఇహమున స్థిర సుఖమ్ము

పరము వైకుంఠ ప్రాప్తిని వరలినారు

స్కాందపురాణాంతర్గత

వందిత రేవా విభాగ వైభవమందా

నందిత నాల్గవ  కథ గో

విందుని దివ్యచరణారవిందార్పణమౌ

          నాల్గవ కథ సంపూర్ణం

           ఐదవకథ

        --------&--&---

  పుత్ర సమముగాను పుడమిజనంబుల

పాలనంబుజేయు ప్రాజ్ఞుడనగ

మంగలాంగుడైన తుంగధ్వజ ఱేడు

మనుజకోటి భాగ్యమనగ వెలిగె

ప్రజల బాధించు మృగముల పరగ మాన్పి

తిరిగి రాజ్యముజేరగా తరలు వేళ

నొక్క మారేడు వృక్షము ప్రక్క నిలువ

గోప బాలల వ్రతమటు గోచరించె

గోపకులు జేయు వ్రతమిది

భూపుడ నే వందనమిడ పూనగ తగునా

దాపున గల జనములు గన

నా పరువిటు నిలుచునె యని నాథుడు నిలిచెన్

స్వామివారి ప్రసాదము ప్రేమతోడ 

గోపకులు నిడి మ్రొక్కిరి భూపుడంత

విడిచి వెళ్ళిన నూర్గురు కొడుకులు ధన

ధాన్య సంపత్తి నశియించ దైన్యమొందె

కనుల వ్రతము గనక కరములు మోడ్చక

నిడు ప్రసాదము గొననిష్ట పడక

గర్వ పడిన వేళ సర్వము నశియించు

నన్నభావ మెరిగె నవని విభుడు

సత్యదేవుని వ్రతమును సలుపుచోటు

చేరి భూపతి భక్తితో శిరము వంచి

గోపకులను కలగలిసి యోపి పూజ

చేరి దివ్య ప్రసాదము స్వీకరించె

సత్యదేవుని నిత్యము స్మరణజేసి

ఆయురారోగ్యమైశ్వర్యమందగించి

పుత్ర పౌత్రులతోగూడి పొంగిపోయి

అంత్యమున విష్ణు పదమొందె నవని విభుడు

కథను వినువారి గనువారి వ్యథల బాపి

బహుళ ధనధాన్య సంపదల్ ప్రాప్తినొసగి

ముదముభువిలోన పరమున మోక్షమిడును

సత్యదేవుని కరుణిడు నిత్య శుభము

దారిద్ర్యమున్ బాపి ధనధాన్యముల గూర్చు

          సత్యదేవుని వ్రతము సలిపినంత

సంకెళ్ళు చేధించి స్వాతంత్ర్యమున్ బంచు

          సత్యదేవుని స్మరణ సాగినంత

దైన్యము పరిమార్చి ధైర్యము కలిగించు

          స్వామిచెంతన శిరము వంచినంత

వాంఛితములదీర్చి ప్రారబ్ధమును మార్చు

          వ్రత కథల్ నోరార పలికినంత

సర్వ దుఃఖముల్ పోద్రోలి సంతసమును

కష్టనష్టముల్ పరిమార్చి కౌతుకమును

ఇహము సుఖమును మోక్షమునిడును పరము

సత్యనారాయణస్వామి జయము జయము

సత్యనారాయణస్వామి జయము జయము 

స్కాందపురాణాంతర్గత

వందిత రేవా విభాగ వైభవమందా

నందిత ఐదవవ  కథ గో

విందుని దివ్యచరణారవిందార్పణమౌ

          ఐదవ కథ సంపూర్ణం

సర్వం శ్రీ రమా సహిత సత్యనారాయణ స్వామి చరణారవిందార్పణమస్తు

        

   

     

నా హృదయంలో నిదురించే చెలి

      గణేశస్తుతి

             (1)

శ్రీ గణేశ చిద్విలాస

వేగ కరుణ చూపము

రాగముతో హరివిల్లుల

రచన సాగ జేయుము

     

       సరస్వతి స్తుతి

               {2}

భాసర వాసిని భారతి

మదినిలువగ వేడితి

పదపదమున నిలిచి మధుర

భావము నిడ కోరితి

        ఇష్టదేవతా స్తుతి

                 ( 3  )

సీతా లక్ష్మణ మారుతి

సహిత రామ చంద్ర జయము

నిను నిత్యం తలచిన మది

పొందును గద నిత్య శుభము

        అమ్మనాన్నలకు వందనం

                    (4)

తనువునిచ్చి ప్రాణమిచ్చి

ధరణిలోన నిలిపెనమ్మ

రక్తము పాలుగ మార్చి

పెంచి పెద్దజేసెనమ్మ

                    (5)

నామాట నాపాట

మానాన్న స్వరము

నాఘనత నా చరిత

మానాన్న వరము

                   (6)

నాదారిలో ముందు 

నడిచింది నాన్న

దారంట ఈ పూలు 

పరచింది నాన్న

                    (7)

పుడమిలోన కనిపించే

దేవతలు తలిదండ్రులు

ప్రణుతులిడుదు పరవశించి

వారు ప్రాతఃస్మరణీయులు

      గురువునకు వందనం

                      

                      {8}

అక్షరాలు నేర్పించి

 రంగరించి అనుభవాలు

జ్ఞానము కలిగించిన గురు

దేవునకిదె వందనాలు

                        (9)

హరివిల్లులలో భావన

హిమవన్నగ శిఖరము

హరివిల్లులలోన  భాష

నవనీతసమానము

                ( 10)

నింగిలోని చందమామ

నేలపైన వాలింది

నవ్వువెన్నెలలు చిలికే

చెలి మోముగ మారింది

             (11)

గుండె బావిలో దాగిన

ప్రేమ వెలికి తీసింది

నవ జీవన గమనానికి

కొత్త దారి చూపింది

             (12)

నవ్వు పూల బాణాలు

రువ్విందొక సారైనా

జ్ఞాపకాల దొంతరగా

నిలిచిందీ హృదయాన

              (13)

నీలికళ్ళ ఆకాశం

భావాలకు పుట్టినిల్లు

చదువగలుగు మనసుందో

సరసాల విరిజల్లు

                (14)

ఓరకంట రచియించును

వేల ప్రేమగీతాలు

సారమంత వినిపించును

మ్రోల మధుర రాగాలు

               (15)

పెదవుల కదలిక సృజించె

పలుమాటల హృద్ఘోష

ఎద సొదలను వివరించగ

 ఎనలేనిది మౌనభాష

                    (16)

మెలుకువలో మురిపించును

మదికోరిన చెలి రూపం

"కల" వరమై కలవరమై

నిశి నిదురకదే శాపం

                       (17)

చెరుకురసం చెలిపలుకులు

వేసుకున్నదీ పంతం

తరగని మధురిమ కుదరని

చెరుకు ఓడెనాసాంతం

                         ( 18)

చెలికబురుల మోసుకొచ్చె

నేమొ గాలి చల్లదనం

పులకరించి పరవశించి

ఊగె మనసు పూలవనం

                          (19)

ఝుంఝుమ్మని తుమ్మెదలే

పూవులతో గుసగుస

అది గని పడమర దిశ గొనె

నున సిగ్గుల రుసరుస

                          (20)

కనులముందు చెలి ఉంటే

యుగాలన్ని క్షణాలు

కనిపించని తరుణంలో

క్షణాలౌను యుగాలు

                         (21)

తటిల్లతగ కనిపిస్తే

ఆకలేల దాహమేల

తృటికాలం మరుగైతే

ఆకలేల దాహమేల

                            (22)

విషయము ఏదైతేనేం

నీ మాటలలో వినాలి

మోము హావభావాలను

మనసారా కనాలి

                             (23)

బెట్టు చేసినపుడు రెండు

మెట్లు దిగితె నష్టమేమి

పసితనమును గను యోగం 

 కలుగ మించు భాగ్యమేమి

                             (24)

తనకు బాధ కలిగించే 

మనిషైనా ఘటనైనా

మనకు కూడ శత్రువు కదా

క్షణమైనా యుగమైనా

                               (25)

ప్రేమంటే ఇవ్వడమని

కానుకకై వెతికినాను 

మనసుకన్న వేరేదని

కడు ప్రేమతొఇచ్చినాను

                               (26)

నా కనులకు నీరూపం

కలిగించును ఆనందం

నిను గూర్చిన యోచనలో

పులకించును నా డెందం

                          (27)

తరిగి పోని కరిగి పోని

సంపద ఏముంటుంది

అని అడిగితె నీ ప్రేమని

మనసు విన్నవించింది

                  

                        (28)

ప్రేమ క్షీరసాగరాన్ని

మదించగా తెలుస్తుంది

హలాహలంకాదు దివ్య

అమృతమూవరిస్తుంది

                       (29)

చిరుగాలి సవ్వడిలో

నీ రాకను చూస్తున్నా

ఆ చల్లని తాకిడిలో

పులకింతై పూస్తున్నా

                          (30)

ప్రతి కదలిక రేపుతుంది

నాలో భావోద్వేగం

పాటలుగా మాటలుగా

విరిసిన సంధ్యారాగం

                            ( 31)

మరువలేని మరచిపోని

మధురమైన జ్ఞాపకాలు

నను వీడని నీ ఉనికిని 

ఎగరేసిన బావుటాలు

                               (32)

క్రొత్త ఆశ చిగురిస్తే

ఆమనికది ప్రతిరూపం

పెను కోపం కనిపించిన

అదే గ్రీష్మభఋతు తాపం

                         (33)

దయ కన్నుల కురిపించిన

అదే వర్ష క్రతువు

ఆనందపు సిరివెన్నెల

అలర శరదృతువు

                           (34)

వణికించే వేదనలో

మునిగితివో  హేమంతం

బాధలన్ని రాలిపోతె

శిశిరమె కద ఆసాంతం

                           (35)

కనులెరుపై ప్రసరించే

కోపంఎండాకాలం

చురకత్తుల చూపులు దహి

యించే నిప్పులగోళం

                             (36)

నీ ప్రేమను వర్షములా

కురిపించిన వేళ

హృదయంలోఆనందపు

 విరిమొలకల హేల

                          (37)

హిమశీతలమనిపించెను

సరసం సల్లాపం

చిరు కలహాలేకూర్చెను

నులివెచ్చని తాపం

                          (38)

లోకమంత ఒకవైపు

ప్రియభామిని ఒకవైపు

నిలిచిన వేళన హృదయం

చేరెను రెండోవైపు

                           (39)

నిన్నుగన్న వేళ కళ్ళు

వెన్నెల లోగిళ్ళు

జాడతెలియకుంటె నదీ

నదముల పరవళ్ళు

                            (40)

కెరటాలై ఉప్పొంగిన

సంతోషంనీవే 

చిరుగాలై ఏదమీటిన

స్వాంతనమైనావే 

                           (41)

నామాట నీమాట

కలిసి యుగళగీతం

జీవితాన ఆనందం

పంచిన సంగీతం

                          (42)

ఆశలెన్నొ చిగురించిన

కొత్త జీవితం నాది

విచ్చేసిన ఆమనికి

నీవే కద పునాది

                           (43)

నీ ప్రేమే వర్షముగా

హృదయం తడిసింది

ఎదనిండుగ సంతోషం 

మొలకల పొడమింది

                          (44)

నీవే ఒక కెరటమయి

పాదం స్పృశియిస్తావు

అంతలోనె దూరంగా

కడలిన కనిపిస్తావు

                          ( 45)

మనసారగ నిను చూసి 

మైమరచి పోతున్నా

కనులుమూసినా తెరచినా

మరవలేక పోతున్న

                             (46)

గాలివెదురుసోకి మధుర

రాగమాలపించింది

నీ పిలుపున నాపేరే

రమ్యమై నిలిచింది

                           (47)

నీ ఊసులు లేకుండా 

మాటాడేదేముంది

ఊహలలో నువు లేక

ఆలోచన రానంది

                          (48)

ఆనందానికి రూపం

నా ఆశల ప్రతిరూపం

నీవే నా వేదనల

చీకటి బాపే దీపం

                        ( 49)

కలికి రంగవల్లిక యై

అరుదెంచిన ఈసమయం

అలికి సిద్ధమై వేచిన

ముంగిలి నా హృదయం

                       (50)

నీపైన నాప్రేమ 

అంతులేని ఆకాశం

ఆపైని తారకలే

మురిపించిన అవకాశం

                         (51)

గీతంలో చరణాన్నై

మనసుదోచుకుంటున్నా

పల్లవిగా రావాలని

నిన్నుకోరుకుంటున్నా

                  (52)

నా యోచన పథానికి

నీవే ఒక గమ్యం

అను నిమిషం నిను జేరె

తలపులు బహురమ్యం

                  ( 53)

ప్రశాంతమై వైఫైలా

చుట్టుకున్నదేమొ నిన్ను

దరిజేరిన ఆసాంతం

ఆవరించెలేనన్ను

                     (54)

నీ మౌనం మాటలుగా

వినిపించును నాకేలా

నా మాటలు మౌనంలా

కదిలించవు నిన్నేలా

                       ( 55)

నమ్మకమే పునాదిగా

కమ్ముకున్న ప్రేమ

నమ్మలేని సాంత్వనమును

మదికిడునని ధీమ

                        ( 56)

కమ్మని కలలైనాయి 

నిదురలేని రాత్రులు

తెమ్మెరలై వీచినాయి

నినుగూర్చిన ఊహలు

                             (57)

నోరొకటే మాటాడే 

సాధనమని అనుకున్నా

కనులు మనుసు లోని సొదలు

పలుక నేడు వింటున్నా

                          (58)

జీవితమే ఎడారిలా

పరితపించు వేళ

నీవే ఓయాసిస్సై

మురిపింతువు గద చాలా

                       (59)

కుండిలోని పూలమొక్క

నిండుగానె విరిసింది

పండుగల్లే నీ నగవే

నిండుహృదిన మెరిసింది

                           (60)

నా పక్కన నువ్వుంటే

ప్రపంచానికధినేతను

నేనొక్కడినే ఉంటే

దిక్కులేని అనాథను

                            (61)

నీ మాటల సరిగమలు

సుప్రభాత గీతాలు

నీ లాలన మధురిమలు

జోజో సంగీతాలు

                           (62)

ఊహల సామ్రాజ్యాన్ని 

సొగసుగ నిర్మించాను

నిన్నందున మాహరాణిగ

నిలుపుకొని మురిసాను

                         (63)

నీపైన నాభావము

కడలెరుగని ఘన కడలి

అదితెలిపే నాభాష

చిరు గరిటెన నీరు చెలి

                         (64)

మౌనాన్ని ఓడించి 

మాటాడాలని ఉంది

ఎదురుపడిన ప్రతీక్షణం

ఆ మౌనమె జయిస్తుంది

                         ( 65)

నీ పాదం తాకాలని

కదలుతున్న కెరటాన్ని

నా చలువను పంచాలని

కోరిన ఆరాటాన్ని

                        (66)

 

ప్రసరించే వెచ్చదనం

నీచూపుకు గలనైజం

నా మది నీహారమును

కరిగించిన పచ్చినిజం

                          (67)

అందమనేనెయ్యివేసి 

వండిన బిర్యాని

కనులనిండ తినిపెడితే

మనసునిండు జాని

                            (68)

ఘనీభవించిన నామది

నిన్గనని వేదనలో

కరిగి కరిగి కన్నీరై

జాలువారె కన్నులలో

                            (69)

ఈ చల్లని చిరుగాలి

తాకి మురిసె తనువేమొ

బహుశా ఇంతకు మునుపే

నిన్ను తాకి వచ్చెనేమొ

                              ( 70)

పట్టపగలు ఉదయించిన

జాబిలిలే నీ వదనం

వెన్నెలలై విరబూసిన

చిరు నగవులపూలవనం

                                (71)

నీ మోమున చిరునగవు

కలకాలం నిలవనీ

నేనడిగిన ఈ కోరిక 

భగవంతుడు తీర్చనీ

                            (72)

ఎదలోని భావాలు

నయాగరా జలపాతం

పది చినుకులు నినుచేరిన

చాలు ముదమె అనవరతం

                            ( 73)

ప్రేమ పరిమళం పంచే

మల్లెపూల తీగవనీ

పందిరినై పరుచుకున్న

ఆలంబన కావాలని

                            (74)

కాలం పరుగుల రాణి

నీతో కలిసున్నప్పుడు

ఆ కాలమె గిరి కరణి

నాతో నువు లేనప్పుడు 

                             (75)

నా ఆశకు రూపమిచ్చి

అందమైన మనసునిచ్చి

పోల్చుకుంటె నీవే కద

అందుకు నీవంటె పిచ్చి

                             (76)

అంతరంగ భావాలు

విహరించే విహంగాలు

ఊతమిచ్చి ఊపునిచ్చు

నింగే కద ప్రియురాలు

                    ( 77)

నీ కలయిక నిచ్చెనగా

నిను గానక పాములుగా

జీవన వైకుంఠ పాళి

ఆడుతున్న ఒంటరిగా

                       (78)

హాయ్ అని నీ పలకరింపు

మృదు మధురపుగానం

నవనాడులకుత్తేజం

నొసగిన బహుమానం

                      (79)

పసిపిల్లగ నువుచేసే

అల్లరి నా సుకృతం

నను శాసించే పెద్దగ

మాటలె మధురామృతం

                     ( 80)

చెంగావి రంగు చీర

దాల్చి సాగు నీపయనం

తూరుపు అరుణోదయమును

తిలకించెను నా నయనం

                     ( 81)

హరిత వర్ణ వలువ లోన

అలరిన నీ రూపము

పచ్చనైన పంటచేల 

పుడమియె కద నిక్కము

                   (82)

సిరివెన్నెల కోసము ఈ

చకోరాల ఎదిరిచూపు

నీ చిరునగవుల కొరకు 

వేచితి గద నీ దాపు

                  (83)

నామాటలు నా చూపులు

నటన అని పలుకబోకు

అంతరంగమును పొడమిన

సుమలత అది మరువబోకు

                     (84)

నీ కనులు నను గను తరి

వేయి వాల్ట్స్ బల్బు కాంతి

నీ మోమున కనుగొంటిని

అదే ప్రేమ కదా యింతి

                      (85)

నీ గురుతుల కొరకు వస్తు

వులను చేరి అడుగుటేలా

పదిలంగా దాచుకున్న

నా మదిని అడగవేల

                      ( 86)

మేడలు మిద్దెలు వద్దు

మీరిన సంపదలొద్దు

కలకాలం ననువీడక

నువ్వుంటేనే ముద్దు

                        (87)

మనసులోని భావాలను

కనుల కపోతాలతో

నీమది చిరునామాకు

పంపినాను ప్రేమతో

                          ( 88)

రచన సేయ వస్తువుకై

మనసుపుటల త్రిప్పినాను

ప్రతి పుటలో నీవైతే

వేల కవితలల్లినాను

                           (89)

నిలిచి ఉన్న నామనసును

మాటన నడిపిస్తావు

పరుగులెత్తు యోచన నా

మాటల నిలిపేస్తావు

                         ( 90)

నిదుర సీమ విహరించిన

మధుర స్వప్నముదయించెను

పెదవులపై చిరునగవుల

సుధగ నిన్ను మది గాంచెను

                         (91)

ప్రాణికోటి మేలుగోరి

కదులు పుణ్య నదివి నీవు

అలసిననిను అక్కునగొను

కడలినేను తెలుసుకోవు

                             (92)

నీ ఒడిలో తలవాల్చి

నిదురించేవేళలో

లోకం దాసోహమంది

ధైర్యపు లోగిళ్ళలో

                           ( 93)

మృదుమధురపు నీ మాటలు

నాదారిని మార్చినాయి

అలుకల కులుకులు మంచిని

అలవోకగ తెల్పినాయి

                           ( 94)

కరిగి పోవు కాలంతో

కరిగి పోని మనప్రేమ

ప్రళయ ఉరుము గర్జనతో

బెదిరిపోని చిరునామా

                             ( 95)

నాపై గల నీప్రేమ

పసిపిక్ మహ సాగరము

నాపైన నీధీమా

ఎవరెస్ట్ హిమవన్నగము

                             (96)

నీ చూపుల జడివానలొ

చిత్తడిగా తడిసాను

నీ నగవుల కిరణాలలొ

నులివెచ్చగ మురిసాను

                            ( 97)

చల్లని చలిలో ముకుళిత

మోహనమే నీ అందం

నా యెద వెచ్చదనానికి

వికసించిన అనుబంధం

                               (98)

చినుకై నువు భువిచేరగ

వెలుగైనిను కలిసెను మది

ఏడురంగులున్న ప్రేమ

హరివిల్ల్లై విరిసినది

                               ( 99)

గేయంలో ప్రతి అక్షర

మై నిలిచిన మాట నిజం

రాగంలా మురిపించిన

నీవుకూడా నిజం నిజం

                            ( 100)

పలురంగుల విరిమాలగ

లోకం నిను నుతియించగ

దారంలా నీ ఉనికిని 

నిలుపుతాను కడు ప్రేమగ

                         (101)

మట్టినంత దాచుకున్న

పూలకుండినైనాను

పూలమొక్కవై నిలువగ

చూసి సంతసించాను

                           ( 102)

గోదావరి తరంగాల

మెరిసె భాను కిరణము

నా హృదయపు రంగముపై

నిను నిలిపిన వైనము

                            ( 103)

నాకు ఉన్న పని యొక్కటె

నిన్నారాధించడము

తుమ్మెదలా నిను చుట్టి

మోదము కలిగించడము

                             (104)

నీమాటలు మధురిమకు

చూపును గద అర్థము

ఎన్నడిడదదేమిటో

కలనైన అపార్థము

                              (105)

నీ మౌనం ఎన్నెన్నో 

భావాలకు పుట్టినిల్లు

నీకోపం నా భవితను

చిగురించే వానజల్లు

                          ( 106)

సూర్యోదయమయ్యిందని

తూరుపుదెస చూడనేల

నీ మోమున అలరారె

తిలకమును గన మ్రోల

                       (  107)

నీ పెదవులు ఇడు మాటలు

నా మనసును దోచెనులే

వేణుగాన రవళి వలే

అనునిమిషం తోచెనులే

                        ( 108)

అయ్యారె నీమోమున

విరిసిన నగవుల బోనము

సరితూగదువేలాది

రూపాయల బహుమానము

                         ( 109)

జీవితమను రథమునకు

కలవు రెండు చక్రాలు

ఒకటి నీవు ఒకటి నేను

లేవిక సందేహాలు

                          ( 110)

మత్తులోన తూగుతుంటే

ఆనందమె ఆనందం

ఆ మత్తే నీవైతే

అదియే పరమానందం

                         (  111)

అనుకోని సంఘటనలు

శిలగా మార్చేసాయి

నీ దరహాస పరాగం

నను మనిషిని చేసాయి

                            (112)

అరవిరిసిన పుష్పంలా

ఊయలలూగేస్తుంటే

చిగురాకుల గలగలగా

లాలిపాట నేనంటే

                           (113)

మావిచివురులా నీవు

మత్తురేపితే చాలు

గండు కోయిలై నేను

పాడుదులే గీతాలు

                        (114)

నీ హృదయపు కిటికీనై

నిన్ను కోరి నిలిచిపోని

ఈ లోకపు పరిచయాన

యానకమై వెలిగిపోని

                        (115)

నీ సంతోషం నేను

నా సంతోషం నీవు

నీవు నేను ఒకటైతే

కడగండ్లే లేవు లేవు

                          (116)

నీ గుండెల సవ్వడులు

నాకేదో చెబుతోంది

తీయని సంగీతాన్ని

నా మనసే వింటోంది

                    ( 117)

చలిగాలికి వణుకువేళ

నీవొక వెచ్చని కుంపటి

మండుటెండ సాగు వేళ

చిరుగాలికి నువు సాటి

                           ( 118)

కనులు మూసి చూస్తున్నా

నీ కమ్మని రూపాన్ని

ఏ రవివర్మో గీసిన

అందమైన చిత్రాన్ని

                            (119)

తళుక్కుమని మెరిసింది

గగనంలో సౌదామిని

గమ్యమును చూపింది

నీరూపము పులుముకుని

                             (120)

చీకటి ఆకాశాన్నై

దిగులుపడిన ఈ సమయం

సంతసాల వెలుగిడె నీ

నగవుల చంద్రోదయం

                          ( 121)

సాగుతున్న నా అడుగుకు

లేదిక ఒంటరితనము

నీ అడుగులు కలిసి మెరిసె

జంటగ చురుకుందనము

                           (122)

ఆకర్షణ విషయంలో

నీ మది సూదంటురాయి

నిను చేరిన తరుణంలో

లోహమునై నిలిచితోయి

                         (123)

చిరుగాలి నీ కబురులు

మోసుకొని ననుచేరి

మురిపాల ముచ్చట్లు

వినిపించెను సుకుమారి

                         (124)

తపన తపము గా మారె

ప్రతి నిమిషం నీకోసం 

కనిపించిన చాలు మదికి

ఒనగూరును మధుమాసం

                        (125)

వేదనలే మండుటెండ

లా వేడిమి కురిసినా

హిమశీతలమై చేరి

చల్లదనం పంచనా

                        (126)

నీ మనసును చదివినాను

నీవడిగినదిస్తాను

నీ మోమున చిరునగవును

చెరగనీక చూస్తాను

                          (127)

గుర్తు పెట్టుకున్నాను

నిన్ను మరచి పోలేను

కాదుకాదు గుండెల్లో

నిన్ను నిలువుకున్నాను

                         (128)

నువ్వాదరిపై నున్నా

నేనీదరిపై నున్నా

మన మనసులు కృష్ణమ్మై

కలుపడమూ చూస్తున్నా

                        (129)

నమ్మకమే దేవుడట

నమ్మకమే జీవమట

నమ్మితి నువు సొంతమని

నమ్మిక నిజమౌతుందట

                         (130)

తరిగిపోవు ధనమేల

విరిగిపోవు వస్తువేల

కరిగిపోని ప్రేమ ఉన్న

సిరిసంపద మాటేల

                          (131)

సంతోషం విరబూసిన

నువు గుర్తుకు వస్తావు

కన్నీటి కడలెగసిన

నువ్వే కనిపిస్తావు

                           (132)

అలక మంచు కురిసి నీవు

మొగ్గలాగ ముడుచుకోకు

నునువెచ్చగ బతిమాలే

నను ఎన్నడు మరచి పోకు

                        (133)

బీటలువారి ఎండిన

భూమికదా నా హృదయం

నీ స్నేహం చినుకు సోక

పులకరించునీ సమయం

                         (134)

నా పంచ ప్రాణాలకు

రూపమిచ్చి చూస్తె నీవు

నా ప్రియాతి ప్రియమైన

వస్తువువై నిలిచినావు

                          ( 135)

పర్ణశాల ఐన గగన

మంటు మేడ ఐనాసరె

నీవు ఉంటె స్వర్గ ధామ

మౌను వెలుగు నయ్యారె

                          (136)

ఒంటరిగా యోచిస్తే

చావుకు నే బానిస

జంటగ నువు కలిసొస్తే

బతుకునకొక భరోస

                         (137)

నీ కళ్ళు మేఘాలై

ప్రేమను వర్షిస్తుంటే

నా మోమున ఆనందం 

మొలకలుగా మొలవదటే

                          (138)

నాబలము నా ధైర్యము

నువు కురిపించే ప్రేమ

కడలేని ఆనందము

అందించే చిరునామా

                          (139)

నాఊహలు కవితలుగా

రచనలు చేసాననుకో

ఆ కవితల నాయకివి

నువ్వేనని తెలుసుకో

                           (140)

నిను గానని నాడు నాకు 

నింగి నంటు కోపము

ఆ కోపము నీపై గల

 ప్రేమకు  ప్రతి రూపము

                         (141)

నీ కన్నులు సంతసాన

వెలుగులీన నిండుగ

నాడే పలు దివ్వెలున్న

దీపావళి పండుగ 

                           (142)

వెనువెంటనె నడయాడె

తోడగు నీడవు నీవు

చీకటినైనా వీడని

పెను బంధమువైనావు

                              (143)

కలవా కానే కావు

మెళుకువలో విడడానికి

తలపే మరి కావుకావు

నిదురన విడి చనడానికి

                             ( 144)

మౌనం కన్నా భాషా

వేరుందా లోకంలో

నీపైనా నాప్రేమను

పలికే మధు భావంలో

                          (145)

నీవలన నాకొక ఉప

కారం కావలెను చెలి

నాతోడుగ నీవుండే

వరమునిడురా నెచ్చెలి

                         (146)

రాళ్ళపైన నీ పేరు

అందంగా చెక్కలేను

నాగుండెన చెక్కకుండ

కలనైనా ఆగలేను

                           (147)

నన్నునాకు చూపించే

అందమైన దర్పణం

నీవే కద చెలి అందుకె

సర్వమూ సమర్పణం

                           (148)

ఆ కొమ్మకు విరబూసిన 

సుమబాలవు నువ్వు

ఆ పరిమళమును పంచును

సిరులొలికే నీ నవ్వు

                        (  149)

గత జన్మల బంధమేమొ

చెలియా మనదగు ప్రేమ

నదీ కడలి కలయికగా

వెలుగొందినదీ గరిమ

                    (  150)

అనునిత్యము నూతనంగ

పల్లవించి మురిపించును

పాతదనం లేని ప్రేమ

గలుగ మనసు పులకించును

                    (151)

ప్రేమ అనే మాట పిచ్చి

తనమని భావింతురొకో

పిచ్చివాడినే నేనని

ఒప్పుకుందు తెలుసుకో

                   ( 152)

నీ బుగ్గల గులాబీలు

పూసిన నును సిగ్గులు

నామోమున విలసిల్లెను

చిరునగవుల మొగ్గలు 

                    ( 153)

ఎంత కష్టమైనా సరే

నీకోసం భరిస్తాను

ఎన్ని బాధలైనా సరె

నీకోసం సహిస్తాను

                         (154)

నాకున్నది కడు స్వార్థం

నా నువు బాగుండాలని

నా నవ్వులకిక అర్థం

నా నువు బాగున్నావని

                           (155)

వందమందిలో ఉన్నా సరె

నీ ఉనికే తెలుస్తోంది 

వేయి పనులనున్నా సరె

నీగూర్చే తపిస్తోంది 

                           (156)

గలగలపారే నదిలా

నీమాటల మధురిమలు

అలసట దూరంచేసే

ఉత్సాహపు సరిగమలు

                           (157)

నిండగు మేడన రాణిగ

ఉంచగలనొ లేదో నిను

గుండెను గుడి చేసి ప్రేమ

దేవతగా నిలిపెద విను

                              (158)

ఎదిరిచూపులోని మధుర

వేదనలో ఏమున్నది

నిదురన మెలుకువలోన

నిను తలచెడి గుణమున్నది

                            (159)

బంగారంతో పోల్చను

విలువ హెచ్చి తగ్గుతుంది 

ధనమునకు కాలానికి 

నీ ప్రేమే లొంగనంది

                 (160)

వెంకటేశ తిరుమలేశ

శ్రీనివాస పాహిమాం

కలిదైవమ  కరుణనుగను

దీనబంధు రక్షమాం

                        అమరవాది రాజశేఖర శర్మ

               

         

మన ఆచారం - ఘన విజ్ఞానం

శ్రీ గణనాథ చిత్తమున్ స్థిరత నిల్పి
పద్యముల రాయ బూనితిన్ పరమ ప్రేమ
నవరసమ్ములు రచనలో నాట్యమాడి
బుధ జనంబుల మెప్పును పొందనిమ్ము(1)

శారదా దేవి పద సారసాబ్జములకు
పరిమళమ్మిడు పద్యాల విరుల సరుల
భక్తి నర్పించగా కృతి శక్తి కొలది
రచన సేయగ బూనితి రాజితముగ(2)

రామా రఘువంశార్ణవ
సోమా సుర నర ముని నుత శుభగుణ ధామా
మామన్మందిరమున నిలు
మో మాధవ సుప్రకాశ ముదమును గూర్పన్
                                                   (3)

భరత దేశంబు సుశ్లోక భాగ్యసీమ
నత సదాచార సంపన్న నుత సుశీల
ఆయురారోగ్య సంవర్ధితాంతరంగ
నిత్యసంతోష భరితయౌ నిర్మలాంగి (4)

సంప్రదాయములను పేర సలుపునట్టి
నాటి యాచార వ్యవహార కోటులందు
గొప్ప విజ్ఞాన శాస్త్రంబు గోప్యముగను
దాగియున్నది చూడగా  ధన్యమగును(5)

నాడు నేడు దాల్చు బోటుల గాజులు
అధిక రక్త పోటునదుపునుంచు
చేతి నరము దాకి చేతనగలిగించు
ననెడి మాట సత్య మనునరాశ        (6)

రోగనిరోధక శక్తిని
వేగముగా పెంచునాక్యు ప్రెషరను రీతిన్
పోగులకై చెవికుట్టుట
భాగమె నారోగ్యమందు భాగ్యమరాశా (7)


మెరుగగు జ్ఞాపక శక్తియు
చురుకుగ పనిచేయు మెదడు
                                    సూనృతమిదియే
కరములు రెంటిని కలుపుచు
వర వందనమును సల్పిన  వరమె యరాశా        (8)

ఫాలమందున కుంకుమన్ బరగ దాల్చ
నచటి నరములు నుత్తేజ ప్రచలితమయి
మానసిక శాంతి యవధాన మానసమును
గూర్చు;యొత్తిడిన్ మాన్పెడి గుణమరాశ( 9

కాలు సేతుల వేళ్ళకు కలగనూరి
నట్టి గోరింట పత్రమున్ పెట్టి చూడు
తనువునకు నిచ్చు కడు చల్లదనము ; హాయి
నొనరజేయును ;యొత్తిడి కనగ రాదు;   (10)

రాగి లోహము నీటిని వేగిరముగ
శుద్ధిజేయున నార్యోక్తి సూనృతంబు
కాన రాగి కాసుల నది లోన వేయు
భక్తి ప్రభవించె చరితకే బలమరాశ(11)

గుండెకు గర్భాశయముకు
నిండుగ రక్తమును నడుపు నియతిగ నెపుడున్
వెండియు శుభములనిడునట
దండిగ మెట్టెలు తరుణులు దాల్పనరాశా12

ఆమ్లజని నిచ్చు వృక్షములహ్నమందు
రాగి చెట్టీయగలదట రాత్రిపూట
గాన నశ్వద్ధమే పూజ గలిగి యుండు
గుడుల ముందుండి యారోగ్యమిడునరాశ
                                                        (13)

వలయు విశ్రాంతి జీర్ణ వ్యవస్థకిడును
వెడలు విష పదార్థములిక యొడలునుండి
దీర్ఘకాలిక వ్యాధులందేది సోక
కుండ రక్షించు నుపవాస ముండువేళ (14)

కరమునకు నుప్పునిడు నధికారమునను
మందలించిన మనసంత కుందునంత
కలహములు రేగు; నుప్పును కరము కిడగ
వలదు వలదంచు నుడివిన పథమరాశ 15         
ఇంట వాకిట నూడ్వగా మింటికెగిసి
సుడులు దిరుగును  గాలిలో సూక్ష్మ క్రిములు
గోమయంబునలికెడి నేమమనగ
క్రిముల  నాశనమొనరించు కిటుకరాశ (16)

ఇంటిముంగిట ముగ్గులు కంటికింపు
యింపుయే గాక వరిపిండి నింపు కడుపు
చీమలకు పక్షి తతులకు ప్రేమతోడ
ముగ్గు జీవకారుణ్య సమ్ముదమరాశ  (17)

ధ్వనులు మానవ తనువుపై మనసుపైన
కడు ప్రభావంబు చూపుట కద్దుగాదె
వేదమంత్రాల సుస్వర నాదమహిమ
మనసునకు శాంతి గూర్చుటే ఘనమరాశ 18

పచ్చకప్పురంబు పచ్చని తులిసియు
రాగి పాత్రనీట రాజితముగ
దేవళంబుదివ్య తీర్థమై లభియించి
రోగములను పారద్రోలరాశ       19

అమృత తుల్యమౌ వాయువు లలరునంత
బుద్ధి వికసించునాయువు వృద్ధియగును
మనసుకేకాగ్రతయునబ్బు కనుక సూర్యు
డుదయమొందక పూర్వమే నిదురవీడు 20

సందెవేళన యింటిని చక్కబరచ
చీపురును బట్టి యూడ్చుట పాపమనిరి
విలువ గలిగిన వస్తువుల్ తలుపుదాటి
చనునటంచని నుడివిరి గనుమరాశా 21

నిరతము మడిమను దాకును
ధరియించిన కాళ్ళ పట్టి తరుణెముకలకున్
వరమగు బలమును నిడునా
స్వరముయు నిడు దైవ శక్తి  సత్యమరాశా
                                                           22

ద్వారమున మామిడాకుల తోరణాలు
వేడుకల చిహ్నములె గాదు వివరమీయ
గా నమితమామ్లజని నిడు కల్పతరువు
శీఘ్రముగ వాడనిది మావి చెట్టరాశ 23     

మంచి ఆమ్లజని నిడును మించి ఓష
ధిగనుతులు గొన్నయది చెంత తిరుగ చాలు
మిగుల యారోగ్య మిడి బ్రోచు మేడ గుడిసె
యనకయు తులసి యుండుట ఘనమరాశ  24

రాత్రివేళలో సురాధినాథునకైన
చెట్టుకింద నిదుర చేటు గూర్చు
బొగ్గు పులుసు వాయువొద్దికగా వీచి
వ్యాధులను వ్యాప్తి జేయును వలదరాశ                  25

ఉంగరమువేలికిని గుండె కున్నబంధ
మింత యనిచెప్ప నేరము వింతగాదు
నిశ్చితార్థపుటుంగరం నియమముగను
వేలికిడ గుండెకు తెలియు వినుమరాశ  26

పూజసేయువేళ భోజన వేళలో
భూమి మీద పీఠమేమి లేక
వేడ్కకూర్చొనినను విద్యుదయస్కాంత
శక్తి వలన కూలు సత్తువంత                                                27

కొండపై దైవ మందిరాలుండు గనక
చని ప్రదక్షిణ మొనరించి సాగిలబడు
భక్తతతులకు తక్షణ శక్తి నిడగ
నుప్పు పులుపుల పులిహోర నొసగఫలము
                                                           28

దేవళము గంట మ్రోగించ దేహమందు
సప్త చక్రముల్ మేల్కొని దీప్తిజెందు
పొందునేకాగ్రత మెదడునొందు శాంతి
భక్తి పేర ప్రశాంతత ఫలమరాశ          29

గుడుల జనములు కదలాడు గడియలోన
రోగ క్రిములెన్నో యందించు రుగ్మతలను
కప్పురంబును వెలిగించ క్షణములోన
క్రిములు నశియించు శాంతి నీకిడు నరాశ 30

పసుపురాసి శోభ పొసగగ ముగ్గేయ
గడపకందమబ్బు ఘనత గాక
నింటి బయటి క్రిముల నింటిలోకడుగిడ
నీయకుండ సేయు నిక్కముగను 31


కఫము తొలగించు పైత్యమున్ కాలరాచు
బలము గలిగించు తనువుకు చలువనొసగు
పెరుగు మిరియాలు నల్లము తురుము కొత్తి
మీర గలుగు దద్దోజనమే యరాశ 32

మేనిలోనున్న యినుమంత మెదడుజేరి
రక్తపోటును తలనొప్పి రగులజేయు
శిరసునుత్తర దిశనుంచి గురకబెట్ట
తగదయస్కాంత క్షేత్రపుతగువరాశ 33

వస్తు వ్యాపార సంస్థల వాహనముల
ముందు నిమ్మ మిరపకాయ పొందుపరచ
దృష్టి పరిహారమే గాక సృష్టి లోని
క్రిముల దరిజేరనీయని క్రమమరాశ    34

నీటిలో పని జేసెడి నెలతల పద
ములు పగుళ్ళిడు సహజము మలినమైన
బట్టలుతికిన నీళ్ళతో పదము గడుగ
రోగకారక క్రిములంటు రుజువరాశ  35

మాటలాడవలదు మౌనమే మేలగు
కూడు గుడుచు వేళ కోరిపలుక
లక్షణముగనూరు లాలా జలంబింక
నూరకను నజీర్తి నొందరాశ            36

నిదుర మేల్కొన కనులందు నిలిచినట్టి
గొప్ప విద్యుత్తు ప్రసరించు తప్పకుండ
తొలుత హస్తమున్ గాంచుట ఫలితమిచ్చు
గాన నుదయానకరముల గనుమరాశ 37

మనసులోనున్న భావనే కనుల నుండి
కిరణ ప్రసరణ మయి దృష్టి వరలుచుండు
దృష్టిదోషము కలిగించు కష్టములను
దోషపరిహారమున్జేయ తొలుగరాశ   38

ఉత్తర ధృవమాకర్షణోత్సుకంబు
దక్షిణంబు వికర్షణ లక్షణంబు
గాన ప్రాగ్దిశాభి ముఖము ధ్యానమిడును
ప్రాణశక్తిని నొసగు ప్రభాకరుండు   39

గంజినద్ది నేయు రంజిల్లు వస్త్రాలు
క్రిముల నిలయ మగును
విమల పసుపు
రాసి దాల్ప రోగ రాశిని మడయించు
పసుపు కుంకుమద్దు ఫలమరాశ   40

కఫము హరియించు బలమును కలుగజేయు
తనువు శూలల మాన్పును దంత కాంతి
నిడును మేనికాంతిని పెంచు కడుపు లోని
పుళ్ళ మాన్పును యరిటాకు భోజనంబు 41

రాగి మామిడి మోదుగ రగులజేసి
ఆవునేతిని హోమమునాహుతిచ్చి
ఘన సువాసన ద్రవ్యముల్ కాల్చినట్టి
హోమ ధూమము యారోగ్యమోముచుండు
                                                      42

బల్లి మలమూత్రములు మేని పైన బడిన
బొబ్బలెక్కునది విషపు పురుగు గాన
బల్లి పాటుకు స్నానంబు పరమశుభము
కలిమి యారోగ్యదాయక ఫలమరాశ  43

గోళ్ళు కొరుక దరిద్రము గోటి సందు
గలుగు మలినాలు నోటికి కడుపులోకి
జారి జబ్బుల కలిగించు చేరి వైద్యు
ని గన మిగుల ధనము ఖర్చు నిజమరాశ 44

పాదరక్షలు చేతితో పట్టగూడ
దనుచు నుడువుట సత్యమే గనగ నిజము
సాగువేళననంటును రోగక్రిములు
చేతబట్టనారోగ్యపు చేటరాశ   45

చంద్ర కిరణ ప్రభావిత సంద్రమందు
నోషధీ గుణములు మెండు నుండు కార్తి
కంబునను పౌర్ణమీ తిథి కడలి స్నాన
మాచరించిన ఫలమిడు మహినరాశ  46

చర్మ రక్షణ కలిగించు చలిన చేత
నత్వమును రగిలించును సత్వమిడును
ఉదర సంబంధ వ్యాధుల వదలగొట్టు
నంబుధి స్నాన సత్ఫలితంబరాశ 47

రక్త ప్రసరణ మెరుగు పరచును మేని
కాంతి వృద్ధి బొందు మనసు శాంతినొందు
చేయు చన్నీటి స్నానంబు చేవబెంచు
కేశరక్షణ గావించు కిటుకరాశ       48

కులము మతము ప్రాంత కలతలు విడనాడి
ఒక్కచోటజేరి ఒద్దికగను
భోజనంబుసేయ భు"వనభోజన" మాయె
కలిసి బ్రతుక శుభము గలుగరాశ    49

ఉసిరి చెట్టు కింద  నోగిరంబు గొనగ
మనసు తనివిచెందు వనము నడుమ
నాకులందు తినగనారోగ్యమున్ బెంచు
స్వచ్చమైన గాలివరమరాశ      50

తలన శఠగోపమును నుంచ తనువులోని
విద్యుదావేశమంతయు వెలువరించి
మది ప్రశాంతత నొందగ మహిమజూపు
లోహ స్పర్శయే కోవెలలోనరాశ       51

భక్తి తోడుత గుంజీలు పార్వతీ త
నయుని ముందు దీసెడి వేళ నరయ మేని
రక్త ప్రసరణ మెదడుకు రయముజేరి
బుద్ధి వికసించు చుండును పుడమరాశ 52

జీలకర బెల్లము వివాహ కాల మందు
వధువు వరుల శిరస్సున వరుస దాల్ప
గన పరస్పరాకర్షణ కలుగ జేయు
మెదడు చైతన్య మొందెడి విధమరాశ 53

మనసు మాటల నొకటిగా మనగ  చేయు
ప్రాణ శక్తిని పంపగా బాట యగును
పాదముల స్పర్శ   ప్రేమకామోదమగును
కాలు తొక్కించుడందుకే గదయరాశ    54

మల్లె పూవుల వాసన మమతబెంచు
తనువు కుదురుగా నుంచును తపన గూర్చు
వాతదోషమున్ బాపును వపువు రక్త
శుద్ధి జేయును సంతాన వృద్ధరాశ        55

గొడుగు గృహమందు తెరిచిన కుదురులేక
చుట్టుపక్కల వస్తువుల్ పట్టు డబ్బు మనుజులకు కూడగాయమై చనును గాన
తెరువబోకని దెల్పు తెరువరాశ     56

అద్దమతి ఖరీదైనది యందులోను సులభముగ లభ్యమవనిది శోభ గూర్చు
పగిలి పోయిన గ్రుచ్చును ప్రజల కనగ
పగలరాదింట నద్దమన్ పలుకరాశ   57

కటిక చీకటిన్ నఖముల కత్తిరించ
చిగురు సహితము తెగునని   తగని గాయ
మగునని తలచి రవి యస్తమయము పిదప
గోళ్ళుతీయుట తగదను గుర్తరాశ    58

గతిన గ్రహణ కాల మతి నీల లోహిత కిరణములును దాకి కీడు గలుగు
నంచుగర్భిణులను కించిత్తు గదలరా
దనిరి పెద్దలెపుడు గనుమరాశ       59

ఏకవింశతి పత్రాల నేకదంతు
పూజ సల్పగ నారోగ్యపూర్ణమిడును
 శ్వాస చర్మపు వ్యాధుల సంహరించు
 నాకులాయుస్సునందించు ననుటరాశ 60

కారమున్ ముందు గొనుటను కారణమున
నోట లాలాజలంబుల నూట యుండు
జీర్ణ శక్తియు మెరుగగు చేరు తీపి
ముందుగా గొననజీర్ణమొందరాశ     61

తుమ్ముటన్ గననారోగ్య దోషమనుచు
కొంత తడవు నిల్చియు నీరు గొనగ నిచ్చి
దీర్ఘమాయురారోగ్యముల్ దీవెనొసగి
సాగిపోవుట నాచార స్వరమరాశ     62

వక్షమందున వేలాడి లక్షణముగ
నల్లపూసలు నిడునట చల్లదనము
నలుపు దృష్టిదోష నివారణమ్ము గాన
దాల్ప శుభమగు నరయగ ధరనరాశ  63

పంచ పల్లవములు పరిమళ ద్రవ్యాలు
నారికేళ ఫలము చేరియుండు
పసిడి రాగి నీట పావనత్వము గూర్చు
కలశ జలమన నారోగ్యకరమరాశ      64

దేవళంబు జేరి దీక్ష ప్రదక్షిణ
చేసి మూర్తి గాంచి చేతులొగ్గి
తడవు కొంత నిల్వ ధ్యానంబు చేకూరా
మానసిక ప్రశాంతి మనునరాశ          65

ఇంటిముందు వేప కంటికింపేగాదు
దట్టమైన నీడ తప్పకిడును
గాలి యాకు పుల్ల కలిగించు నారోగ్య
జీవనంబు నిడును స్థిరమరాశ           66

దేవదేవుని చరణాల దివ్య భక్తి
సలుపు సాష్టాంగ వందనము లలనలకు
పాడిగాదని నుడివె గర్భాశయమ్ము
నేలకంటగ రాదను నెపమరాశ          67

శ్వాస కోశ వ్యాధి సాగనంపు గుణము
జీర్ణశక్తి బెంచు పూర్ణ గుణము
ముసలి తనపు చాయ వెస జేరనీయని
తమలపాకు యమృత సమమరాశ   68

నవయుగాదిన పచ్చడి నరయ తీపి
పులుపు నుప్పుయు కారము మెలగు వగరు
చేదు కలయిక  రోగ ననిరోధకముగ
ఆయురారోగ్యమిడు పర్వమోనరాశ   69

ఇంటికి సున్నంబిడుటయు
కంటికి నవకాంతి శాంతి కారకమగు నే
తంటలు గానని మది సుఖ
మంటగ తెలతెల్ల దనపుమహిమనరాశ  70

పొద్దు పొడవ చూపుడువేలు బొటన వేలు
నొకటి గా జేసి ముగ్గులనుంచు మగువ
జ్ఞాన ముద్రను దాల్చిన మౌని వలెను
మానసిక శాంతి బొందుట ఘనమరాశ 71

నిదురబోవు నపుడు నొదుగగ కుడివైపు
ఆమ్లమెగిసి గుండె నంటు గాన
ఎడమ వైపు దిరిగి పడుకున్న మేలగు
ననెడు సూక్తి కలను గనుమరాశ      72

మెదడు లేలేత నరముల కుదురుకొనక
చిన్న పిల్లలు తరువుల చివురులనగ
తలలపైగొట్ట తగదని ధర్మమొదవె
సతతమాచారమై భువి చనునరాశ  73

మంచి గంధము చలువను పంచుచుండు
మధుర కంఠమునొనరగా మందుయగును
గాన కలకంఠులకు నలంకారముగను
గంధమును బూయు చందమున్ గనునరాశ                                      74

ఆహారము గొనినంతనె
ఆ హా! నిదురావహించునట జీర్ణముకై
సాహాయము నిడ రుధిర ప్ర
వాహము యటజేర మత్తు వపునకు జేరున్
                                                       75
గోరు వెచ్చని నీటిని కోరి కోరి
వేకువన గ్రోల మలినాలు వీడి చనును
మేని యంగముల్ చైతన్య మూని నంత
నూతనోత్సాహమబ్బగా నోమరాశ      76

పాలు కాఫీలు తేనీరు పరులకిడగ
నోటితో నూది చల్లార్చ మేటి తప్పు
బొగ్గు పులుసు వాయువు చెడి పోవునట్లు
జేయు నోటి క్రిములచట చేరరాశ      77

వేసవిన్ రామనవమియే వేడుకవగ
భక్తి గుఢపాన సేవనాసక్తి బెంచు
విష్ణు కిడు వడపప్పు నైవేద్యమరయ
చల్లదనమును గలిగించు జవమరాశ   78

గాలి శీతలమొందగా కాయమందు
నూష్ణమధికము ఖర్చగు నుదయమందు
పులగ దధ్యోదనంబులు పొట్టకిడగ
రక్ష ధనుర్మాసదీక్షనలరు నరాశ         79

ముంగిటన్ రంగ వల్లులు ముదము గూర్ప
నావు పేడతో గొబ్బెమ్మ నలరజేయ
రోగ క్రిమికీటకాదుల రోయువేళ
మకర సంక్రాంతికాహ్వానమౌనరాశ      80

ఉసిరి పేదల సంజీవినోషధిగను
తులసి యౌషధ రారాజ తుల్యముగను
నిండు కార్తీక పౌర్ణమి పండుగందు
కలిపి కళ్యాణమొనరించు ఫలమరాశ    81

నతము ప్రవహించు నదులందు స్నానమాడ
ఓషధీ గుణములు మేనినుండ గలవు
తనువులో బుట్టు విద్యుత్తు తరలజేయు
నిలన కార్తీక మాసమే నిజమరాశ        82

వానకాలమజీర్ణమే వరలుచుండు
తినెడి యాహార దోషముల్ తీవ్రమగును
నాల్గునెలలేక భుక్తమున్ నమ్ముకున్న
సతతమారోగ్యమొసగు జీవితమరాశ   83

పసిడి నగలను దాల్చిన పరమ శుభము
చర్మరోగాల బాపి సత్సంతతిడును
తనువునుత్పన్న మగు వేడి తరలజేసి
చల్లదనమును కాపాడు జవమరాశ     84

నడుము లావెక్కకుండగా నణచునెపుడు
చురుకుదనమును పోషించు చొక్కముగను
నడుము వడ్డాణమున్ దాల్చ నమిత ఫలము
లోహ స్పర్ష శుభము మేని లోనరాశ     85

మేని చెమటన పగడము మేళవించి
పడతి సంతాన ప్రాప్తికై బలమునిడును
పగడమందానికే గాదు పలు విధముల
నాయురారోగ్యమిడు రత్నమేయరాశ  86

భూమిదానమీయ పూర్ణత్వ మబ్బదు
ధనమునీయ మిగుల తనివిగాదు
పసిడినీయ బూన బహుళంబు కాంక్షించు
తనివి దీర్చు నన్న దాన మొకటె          87

పులుపజీర్ణము గావించు కలిగినంత
పగటి వేళన భుజియించ పాడియగును
పెరుగు రాత్రిన తినగను పిలుచు రోగ
ములను తెలసి మసలుకొన ఫలమరాశ 88

నవరసాలను చిలికించి కవితలల్లి
కావ్యముల నల్లినారు సుకవినృపతులు
భావనామార్గ దర్శులై చేవ గలుగు
సుతుల గన్నట్టి భారతీ శుభము జయము
                                                    (89)

రామకథ మహా భారత రమ్యగాధ
భాగవతమును వెలయించి భక్తి నిల్పె
సంస్కృతీ సంప్రదాయాల చాటగలుగు
సుతుల గన్నట్టి భారతీ శుభము జయము
                                                     (90)

తాంతియా తోపె రాణా ప్రతాప సింహ
ఝాన్సి లక్ష్మి శివాజియు చాందుబీబి
కట్ట బ్రహ్మన యల్లూరి గాంధి నెహ్రు
భగతు సింగుల గన్నట్టి భరత మాత {91}

స్వార్థమింతైన యెరుగక సమరమందు
ప్రాణముల ఫణముగ నెట్టి క్షోణి గలిసి
మాతృ భూమికి స్వాతంత్ర్య ఫలములిడిన
సుతుల గన్నట్టి భారతీ శుభము జయము
                                                    (92)
ఆది శంకరుల్ రామానుజాది సద్గు
రువులు రామకృష్ణులు వివేకుడు జగతిన
పర్యటించిరి బోధనల్ పరిమళించు
సుతుల గన్నట్టి భారతీ శుభము జయము
                                                     (93)

మత విభేదము లెరుగని మానవతను
ప్రాంతభేదము తెలియని భావుకతను
పెక్కుభాషల చవిగొన్న మక్కువ గల
సుతుల గన్నట్టి భారతీ శుభము జయము
                                                     (94)

సరస సంగీత సాహిత్య సత్కళలను
చిత్రలేఖన శిల్ప వైచిత్రములను
వివిధ నాట్యపుకళలీను వేడ్కగలుగు
సుతుల గన్నట్టి భారతీ శుభము జయము
                                                   (95)

తోటి సోదర క్షేమమే మేటిగాగ
దేశ సంరక్షణోద్యోగ దీప్తి వెలుగ
ఎండ చలి వానకోర్చెడి మెండు ధీర
సుతుల గన్నట్టి భారతీ శుభము జయము
                                                     {96}

ప్రాణమను మాట నే తృణ ప్రాయమనుచు
జన్మ హేతువే రక్షణాచారమనుచు
సైనికుండయి సరిహద్దు పూని నిలుచు
సుతుల గన్నట్టి భారతీ శుభము జయము
                                                     (97)
మంచియు విశ్వాసముయు ప్ర
పంచము కలిగుండ గోరు మానసముండన్
యెంచియు నీ నడవడికన
పెంచుము ఆ రెంటి మిగుల మేలగు సుమ్మీ
                                                      (98)


తల్లిదండ్రుల దీవెనల్ వెల్లి  విరియ
గురువు చూపిన మార్గమే గురుతు గాగ
హితుల సలహాలు వెన్నంటి హితము గూర్చ
సేయు కార్యము విజయమై చెంత నిలదె
                                                     (99)
                         
భానుడుదయించి ఎదుగుచు భాసమొందు
మొలక పుట్టుచు చెట్టుయై ముదమునిచ్చు
రోజు రోజుకు నభివృద్ధి రూఢిగాక
జన్మమేటికి తృటిలోన చావుమేలు
                                                   (100)

                           
మంచి శ్రోతకాగలడిల మంచివక్త
పాఠకోత్తముడే కవి పీఠమెక్కు
కొంతనేర్చిన యగునది కొండ సమము
అంకురము లేని వృక్షమున్నరయగలమె
                                                (101)
                                       
ఓటమెరుగని గెలుపు పోరాటమందు
చిత్తశుద్ధిగ లక్ష్యమున్ చేరువరకు
అలసటెరుగని శ్రమ సేయుమహర్నిశలు
విశ్వమంతకు నినుజూపు విజయమొకటె
                                                    (102)
                       
గతమునందున చేసిన ఘనుల పనులు
తిరిగి నీవాచరింపగ నొరుగునేమి
మూస పనులకు విలువలేముండవయ్య
కొత్తదనమును మనసార కోరు జగము
                                                   (103)
                         

తారలంటెడి లక్ష్యమున్ చేరనెంచ
కుసుమమైనను పొందమా కువలయాన
లక్ష్యమందలి ఘనతయే సాక్ష్యమగును
ఉన్నతాలోచనలె జగతికూపిరగును
                                             (104)
                         
చేతకానిది లేదు నీ చేవముందు
ఓటమన్నదిలేదు పోరాటమందు
చిన్ని చేపల మొప్పకే శిరము వంచు
ప్రళయ సంద్రపు అలజడి ప్రకృతి లోన(105
                         

స్వార్థ జీవికి గలిగెడి సౌఖ్యమేమి
బంథుమిత్రుల నొనగూరు బలమదేమి
పరులకుపకారమొనరించు ప్రతినలోన
వనధి లంఘించు శక్తియే వరముగాదె
                                                     (106)
                         
ధనము సంపాదనముసేయ ధరణిలోన
బతుకు సాంతమునంతమై చితికిపోవు
జీవనము సఫలతమొందజేయు కార్య
మొక్కటైనను సలుపక ముక్తి లేదు  (107)

భారతీయత నడుగడుగు ప్రస్తుతించి
సంస్కృతీ సంప్రదాయాలు సంస్మరించి
శాస్త్ర విజ్ఞాన ప్రాభవం సాగనెంచి
రచన సలిపితి పద్య తోరణముగాగ (108)






































































                   

నవ భావనా గీతికలు

నవభావనా గీతికలు
అమరవాది రాజశేఖర శర్మ

                         ( 1)
శ్రీ గణనాయకా సకల
శుభదాయకా సర్వ
విఘ్నముల నెడబాపరా కార్య
సాఫల్య మొనరించరా

ఎలుకనెక్కినస్వామి
ఏలికై రావేమి
తొలి పూజలను చేకొని -కవన
మొలికించ వరమొసగుమీ

                           (2)
భాసురమ్మైనట్టి
దివ్య భాసరక్షేత్ర
వాసినీ మమ్మేలవే -మృధుమధుర
 హాసినీ దీవించవే

కవన శిల్పము నాట్య
గాన చిత్రపు కళల
కధిదేవతవు నీవని - కరుణ సుధ
వరదలై మము చేరనీ

                              (3)

సీతాసమేతమై
సౌమిత్రి యుక్తమై
భద్రాద్రి వాసప్రభో శ్రీరామ
భద్రా నమస్తే విభో

హృదయార విందమను
సౌందర్య మందిరము
నీకొరకు వేచెనయ్యా శ్రీరామ
నీవందునిలగదయ్యా

                            (4)

కాలమే మారెనో
గాలమే వేసెనో
చాలమారెను లోకమూ గనగ
జాలమీ కడు పాపమూ

ప్రగతి పథమందుమా
జగతి గతియందుమా
భగవంతునిదెయందుమా కలిపురుష
పగయందుమా శేఖరా

                          (5)

కరిగెనుత్సాహమూ
విరిగె ప్రోత్సాహమూ
పెరిగె సోమరి తత్వమూ ఇలలోన
తరిగె యువతన సత్వమూ

లక్ష్యమొక్కటి లేదు
దీక్ష పట్టుట లేదు
అక్షయము సృజన గుణము కాలాన
భక్షణమ్మగుశేఖరా


                             (6)

తల్లియన ప్రేమేది
తండ్రియన భక్తేది
గురువుయన గురియేదిరా దైవమే
కరడు శిలగా మారెరా

అతిథి మర్యాదేది
అతివలకు విలువేది
అంత శూన్య మ్మాయెరా
జంతుసమమయె శేఖరా

                             (7)
సహనమడుగంటింది
సఖ్యతే మాసింది
శాంతమే సున్నయయ్యె లోకాన
స్వాంతనముదొరకదాయె

పాపమే పెరిగింది
కోపమే హెచ్చింది
లోపమే ఎరుగకుందీ ఇదిలోక
శాపమయ్యెనుశేఖరా

                          (8)

మంచితనమే మోటు
పంచుతనమే లోటు
లంచమంటే స్విటనీ- మునుముందు
ఎంచి చూడదు చేటునీ

మించినది స్వార్థము
తెంచి పరమార్థము
పెంచు సిరులే లక్ష్యమై-పరులను
ముంచుటేగద శేఖరా

                             (9)

తల్లి తండ్రీ లేరు
చెల్లి అన్నాలేరు
చెల్లెనే బంధుప్రేమ మోసాన
డుల్లెనే డబ్బు మహిమా

స్నేహశీలత లేదు
దేహ బంధము లేదు
ద్రోహమే వెల్లి విరిసే డబ్బుపై
మోహమెక్కువ శేఖరా

                         (10)

విస్తుపోయే విధము
వస్తువ్యాపారము
వాస్తవము మరచిపోయే వేదన
విస్తారమయె జీవనం

పరుల క్షేమము నాస్తి
త్వరగ పెంచగనాస్తి
పెరుగంగ నీదోస్తిలో  స్వార్థమై
ఒరిగిందిదే నేస్తమా

                          (11)

నవ మాసములు మోసి
జవ సత్వములబెంచి
భువిని నిల్పిన జంటనూ బాధింప
ఎవరి మనసెట్లొప్పునూ

బుద్ధిగా మనసార
శ్రద్ధతో సేవించ
నిద్ధరణి భారమాయె చేర్చిరే
వృద్ధాశ్రమము శేఖరా

                               (12)

కన్నవారిని వదిలి
ఉన్నబంధము విడిచి
మిన్న భర్తని తలచెడీ స్త్రీ జాతి
కన్న పూజ్యులు ఎవ్వరు

అక్కగా చెల్లెగా
మక్కువౌ అమ్మగా
చక్కనీ ప్రియురాలిగా మహిళయే
మహరాణిరా శేఖరా

                             (13)

స్వీయ క్రమశిక్షణం
మాయమైనీక్షణం
హేయమైనది జీవనం  అనుక్షణం
గాయమైనది భావనం

రోగాలకాహ్వాన
రాగాలు పలికించు
భోగమంతయు వీడెను  నిరుపేద
యోగమైనది శేఖరా

                              (14)

శక్తివెచ్చించిరి
భుక్తి కాంక్షించిరి
రక్తినిడెనారోగ్యమూ   మంచిదౌ
యుక్తికరమౌ జీవనం

కష్టమే వీడిరి
పుష్టిగా మెసవిరీ
భ్రష్టమయ్యెను జీవితం  రోగాల
కిష్టమైనది శేఖరా

                              (15)

చేలపండిన పంట
పాలు పదుగురికిచ్చి
వాలు పక్షులకిచ్చిరి ఆనాడు
జీవజాలము మెచ్చిరి

సొమ్ము తనదైనచో
ఇమ్ముగా దాచుకొని
గుమ్ముగా భోంచేసిరి  ఈనాడు
బొమ్మకీయరు శేఖరా

                           (16)

ఒకరంటె ఒకరికి
శిఖరమంటిన ప్రేమ
సకలమై బతికినారు  ఆనాడు
సఖులుగా మిగిలినారు

బేధ భావము తప్ప
మోద భావములేని
ఖేదమే పొందినారు  ఈనాడు
మోడులైరీ శేఖరా

                            (17)

డబ్బు గల వారంత
నిబ్బరంగా యుండి
ఉబ్బుతో బతికి నారు ఈ డబ్బు
జబ్బుతో చితికినారు

ధనములో సంతసం
క్షణమైన లేదని
దినదినము కృంగినారు వారలు
మనసులోనే శేఖరా

                             (18)

నీతులను విలువలను
ఖ్యాతిగా తెలిపినా
సినిమాలు ఆడగలవా పెట్టుబడి
ధనమైన పొందగలవా

మర్డర్లు రేపులు
మాఫియా గ్యాంగులు
యుద్ధాల ఫిల్ములివిగో  రికార్డు
బద్దలాయెను శేఖరా

                            (19)

స్వేదమును చిందించి
భోజనము పండించ
బాధలేమిగలనేలా  అప్పులా
రోదనలు ఆగవేల

పుడమి జనులకు రైతు
కడుపు నింపినవాడు
జడిసె బతుకును గాంచగా ప్రాణముల్
విడిచె గదరా శేఖరా

                          (20)

ఆలుపిల్లల బతుకు
గోలగోలగ జేయు
కాలకూటమె మద్యమూ  వదలక
ఏలబతుకుట సాధ్యము

నమ్ముకొను వారలా
కమ్ముకొను కష్టాలు
చెమ్మగిలు కళ్ళజూడు తాగక
తెమ్ము ముదమును శేఖరా

                          (21)

నీడనిచ్చే తరువు
కూడునిచ్చే పరువు
కొట్టగా మనసేలరా ఇలకూల
నెట్టగా భవితేదిరా

పుట్టిన రోజొకటి
పెళ్ళి రోజున ఒకటి
చెట్టు పెట్టి చూడరా పెరుగంగ
సంతోషమే శేఖరా


                          (22)

ప్రాకృతిక వనరులు
సుకృతిన దొరికాయి
వ్యర్థమును సేయబోకు  దీని పర
మార్థమును వీడబోకు

నీటినీ గాలినీ
వీటితో భూమినీ
నీటుగానుంచవయ్యా కలుషితం
వేటితో సేయకయ్యా

                            (23)

పాపలన దైవాల
రూపాలు వారిపై
కోపాలు చూపకండి వారిలో
లోపాలు చూడకండి

నీతులను నేర్పించి
ఖ్యాతిగను జీవించు
కథలసారము తెలుపుమూ  జగతికి
హితునిజేయుము శేఖరా

                          (24)

ప్రభుత సొమ్మంటేనె
ప్రజల సొమ్మేకదా
వ్యర్ధమెందుకు సేయుట ఎడతెగని
స్వార్థమెందుకు చూపుట

వీధి నీటి కుళాయి
వీథిలైటనకోయి
నీదియని తలచమేలు భవితకై
నిధిగ నిల్పుము శేఖరా

                          (25)

నీవు వేసిన చెత్త
నిన్ను ముంచెడి కొత్త
చావురోగము దెచ్చునూ తెలుసుకో
నిన్నె హేతువు సేయును

నీ యిల్లు శుభ్రము
నీవాడ శుభ్రము
నీఊరు శుభ్రమవగా గొనె దీక్ష
స్వచ్చ భారతి శేఖరా

                           (26)

పశువులను పక్షులను
బలిసేయబోకుము
అవికూడ ప్రాణ తతులె  దేవుని
సృష్టికిని వారసులులే

నీటి వసతినిజూపి
నోట గింజల నిచ్చి
చోటు నిలువగ నీయుడి దైవమా
చోట నిలుచును శేఖరా

                            (27)

ఇలనాడు పిల్లలను
చులకనగ చూడకు
పాలకడలికి బిడ్డలూ ప్రేమ మురి
పాలు పంచెడి పాపలు

అన్ని రంగాలలో
ఉన్నతత్వము పొంది
వన్నెతేగలుగువారు బాలికలు
పుణ్యపంటలు శేఖరా

                           (28)


సంసారమున చిచ్చు
హింసాయుతపు రొచ్చు
ముంచేను సీరియళ్ళు చూడకు
మంచేమి లేని పొల్లు

రోజుకో రగడతో
రాజుకొన చూడగా
ఫోజులిచ్చును టీవీలు మెదడున
బూజుపట్టును శేఖరా

                         (29)


కాలమును హరియించు
ఆలోచనను మాన్పు
స్మార్టు ఫోనుల వైనము తెలుసుకొని
వాడుటే నీ లౌక్యమూ

చదువు చెడనీకోయి
విధులచెడి పోకోయి
అదికూడ వ్యసనమేరా ఫోనుతో
అదుపునుండుము శేఖరా


                       (30)

పుస్తకము పఠియించు
మస్తకము వికసించు
చాదస్తమనుకోకుమా విద్యకు
అస్తమయమే లేదురా

నడయాడు గురువుగా
కడలేని తెలివిగా
విడమరచు నేస్తమగును పుస్తకం
జడుపు మాన్పును శేఖరా

                          (31)

కూరగాయల కల్తి
కోరుపండ్లలొ కల్తి
క్షీరమే ఘోరమాయె నూనెలం
దూరకే కల్తియాయె

నీటిలో కెమికలూ
గాలిలో కెమికలూ
పంటలో కెమికలటరా మనిషిలో
ఎముకలయ్యెను శేఖరా

                           (32) తెలివినభినందించు
కలమునభినందించు
బలమునభినందించరా - మేల్గోరు
గుణమునభినందించరా

దాతనభినందించు
నేతనభినందించు
నీతినభినందించరా - మెండుగ
ఖ్యాతినొందుము శేఖరా


                        (33)

నవ్వు సంధానించి
పువ్వులా జీవించి
రువ్వరా పరిమళాలు - దశదిశల
కివ్వరా తేనియలను

మనిషిగా పుట్టాము
ఘనుడిగా ఎదగాలి
వెనుకడుగు వేయబోకు - ఏనాడు
కనుము లోకము శేఖరా


                      (34

 సిరులొచ్చునావెంట
ఒరులొచ్చునావెంట
ధరణిజేసిన పుణ్యమూ కడవరకు
వరముగా వెంబడించు

పరులకుపకారమూ
నిరతమొనరించుట
హరికిష్టమైన కర్మ తెలుసుకో
మురిపెమబ్బును శేఖరా


                       (35)
 
మోసాలు ద్వేషాలు
రోషాలుదోషాలు
వేషాలు వేయబోకు - బ్రతుకులో
పాషాణ రూపుగాకు

కోపాలు తాపాలు
లోపాల కూపాలు
శాపాలుగా మారును - ఒనరించు
పాపాలురా శేఖరా


                     సశేషం


అమరవాది రాజశేఖర శర్మ

శ్రీ రామ షోడశోపచార పూజ

శ్రీరామ గేయ షోడశోపచార పూజ
--------------------------------------------
                    (1)

శ్రీ పార్వతి నందన ఆశ్రిత జనపాలన
సకల లోక పావనా కరుణించు గజాననా
గేయ షోడశోపచార పూజ సేయ బూనితిన్ విఘ్నాలను పరిహరించి బ్రోవనిన్ను  వేడితిన్

                      (2)

షోడశోపచారములతో పూజ సేతునయ్యా రామయ్య
ప్రేమతోడ చేకొని మము కరుణ జూడవయ్య  

                          (3)

శ్రీ విష్ణువు శేషపాన్పు నుండగా -కనుల పండగా
సురలు మునులు  తము గావగ వేడగా నుతుల జేయగా
కమలా సతితో జానకిరాముడవై
మానవ రూపుడవై
మహిలోన అవతారము దాల్చిన నా స్వామికిదే
ధ్యాన్నమూ పద ధ్యాన్నమూ   

                           (4)

సుతుల కొరకు పుత్రకామేష్టి యాగమును జేయు
దశరథ భూవరునకు ప్రియ సుతుడై
సకల భువనములు సంతోషించగ జనియించిన
సాకేత పురీశునకిదె ఆహ్వానము ఆవాహనం

                           (5)

గాధి సుతుని వెంట వెడలి యాగము రక్షించగా
తాటకాది ఘన దైత్యుల తలలను ఛేధించగా
పడతి శాపము బాపి పరమేశు విలు విరచి పరమ పావనీ సీతను పరిణయమాడిన స్వామికి
ఇదే ఆసనం  హృదయాసనం

                            (6)
కైక కోర్కె జనకునాజ్ఞ  కానలలో నుండగా జనకజ సౌమిత్రులతో సరయూ నది దాటగా
నావ నడుపు గుహుని చేత పాదము గడించుకున్న
పరమపురుష రాఘవు పద పంకజముల పాద్యము

                           (7)
దండకాననాన అత్రిముని ఆశ్రమంబుజేరి అనసూయ దంపతుల ఆతిథ్యము స్వీకరించి
దీవెనలచే మునుముందుకు దీక్షబూని సాగిన
మునివంద్యు రఘురామ మూర్తికిదే అర్ఘ్యము

                           (8)

చిత్రకూట పర్వతాన పంచవటీ పంచన
పర్ణశాలలో సీతా సౌమిత్రుల సేవల సౌఖ్యము సంతోషము సంబరాలలో దేలు
సాధు హృదయ రామచంద్ర  స్వామికాచమనీయమూ

                            (9)
మాయలేడి చూసి సీత  మనసుపడీ కోరగా వెంటాడి నిజము తెలిసి వేటువేసి కూల్చగా మారీచుని మర్దించిన మహామహా బలయుతా
రామచంద్ర నీ కొనరు రమ్యసలిల స్నానమూ

                            (10)

దశకంఠుడు మాయచేత ధరణిజ గొని పోవగా
సుదతి కొరకు తరుల గిరుల శోధించుచు నడవగా
శబరీ మాత నిన్నుగని సంతసానకొలిచినా
ధన్యజేసినావు రామ కొమ్ము దివ్య వస్త్రము

                            (11)
వాలిజంపి సుగ్రీవుని వాంఛల నీడేర్చగా కిష్కిందా నగరానికి ఈశునిగా చేయగా ఆంజనేయ అంగదాది కపి వీరులు గొల్వగా
అయ్యోధ్యా సార్వభౌమ యజ్ఞోపవీతము

                           (12)
హనుమంతుని చే అంగుళి అయోనిజకు అందించి
చూఢామణి చూసి సీత యోగ క్షేమముల నరసి
విభీషణునికభయమిడీ విశ్వాసము ప్రకటించు
దాశరథి అర్పించెద శ్రీ చందన సౌగంధము

                               (13)
వనధిని లంఘించుటన్న వశమగునే  మానవులకు
శిలల వాన కురిపించి జలధిని బంధించితి వట
చిత్ర చిత్రమీకథలు నిత్యసత్య  సుచరిత లు పురుషోత్తమ అర్పించెద పసుపు కుంకుమ పరిమళాలు

                              (14)

మేఘనాథు యుద్ధమున సౌమిత్రి మూర్చిల్లిన
ఫవన సుతుని పంచి తెచ్చిసంజీవితో బ్రతికించిన
భక్తజన మందారమ భవబంధ వినాశ రామ నీలమేఘశ్యామ నీకు నిత్య నూత్నమౌ సుమములూ

                             (15)
అహిరావణ  మైరావణ నరాంతకుడు ఆదిగాగ
ప్రముఖ రాక్షసాగణంబు పడి చచ్చిరి నీ శరాల
అరివర్గ వినాశరామ అఘవినాశ శుభనామా
కోసల లక్ష్మి లలామ ఆఘ్రాణించుము ధూపము

                             (16)
పరమేశ్వర ప్రియ భక్తుడు పరమేష్టివంశజడు
అమృత నాభి యుతుండు అఖిల రాక్షసేశ్వరుండు
శలభంబై రావణుడు నీ శరాగ్ని కాలిపోయే అమిత విక్రమా  మహాత్మ అరయుమి తేజో దీపము

                                (17)

విభీషణుడు రాజాయెను విజ్ఞానము వెలుగొందెను
విశ్వమెల్ల వినుతించెను విజయ దుందుభులు మ్రోగెను
సురలు మునులు ముదమొందిరి కురిపించిరి విరుల వాన
నర నాయక ఆరగించు యధాశక్తి నైవేద్యం

                             (18)

విష్ణు వక్షస్థల మందున విలసిల్లెడు శ్రీమాతకు
కళంకమ్ములంటు కొనునె కౌసల్యా సుత రామా
రావణ చెరనున్న సీత చొచ్చెనగ్ని నీ పనుపున
ధర్మదేవతాకృతా శ్రీ రామా తాంబూలమిదిగో

                       (19)
సీత లక్ష్మణులతోడ హనుమంతుడు మొదలు గల
కపి వీరులు కొలుచుచుండ కదలిన కోదండపాణి
అయోధ్య  చేరుకొని అమ్మలఆశీస్సులంది రాజగు శ్రీ రామచంద్ర మంగళ నీరాజనము

                         (20)
శాంతమూర్తి దయా సింధో సాధు తత్వ ఇనకులేశ
దాశరథీ రాఘవేంద్ర దాస జనార్చిత  నరేంద్ర ధర్మరక్షణా మహాత్మ దాన జ్ఞాన ప్రకాశకా సీతారామ చంద్ర చేతు కోటి నమస్కృతులు
      శతకోటి నమస్కృతులు

సర్వం శ్రీ సీతాలక్ష్మణ భరత శతృఘ్న హనుమత్సమేత శ్రీ రామచంద్ర చరణారవిందార్పణమస్తు